2025-yil 23-iyun kuni Prezidentimiz tomonidan imzolangan “O‘zbekiston Respublikasida mahalliy davlat hokimiyati vakillik organlari faoliyatini 2030 yilga qadar rivojlantirish konsepsiyasi” – bu nafaqat normativ hujjat, balki xalq bilan davlat o‘rtasidagi ishonch ko‘prigini mustahkamlovchi tarixiy bosqichdir.

Bugungi islohotlar, avvalo, oddiy fuqaroning dardi, muammosi va hayot sifati markazda turgan boshqaruv modelini yaratishga qaratilgan. Endilikda xalq vakili bo‘lish – faqat muammolarni sanab o‘tish emas, balki ularning ildiziga qarab harakat qilish, yechimni o‘zi bilan birga izlash deganidir.

Bu Konsepsiya deputatlik faoliyatiga yangicha mazmun baxsh etmoqda:

🔹 Endi deputat – qarorlarni nazorat qiluvchi emas, balki ularni ishlab chiqishda teng ishtirok etuvchi subyektdir.

🔹 Endi Kengashlar – maslahat beruvchi emas, balki mahalliy taraqqiyot yo‘nalishini belgilovchi kuchli siyosiy institutdir.

🔹 Endi har bir muammo – yuqoriga yozilgan xat emas, joyida hal qilinadigan mas’uliyatli topshiriqdir.

> “Mahalliy Kengash – bu xalqga eng yaqin davlat bo‘g‘inidir. U qanchalik faol bo‘lsa, tizim shunchalik ishlaydi”

— Prezident Shavkat Mirziyoyev

Men deputat sifatida ushbu Konsepsiyani uch asosiy mas’uliyat yo‘nalishi sifatida qabul qilaman:

1. Shaffoflik va hisobdorlik – men uchun siyosiy mezondir

Xalq vakili xalqdan yashirmaydi. Har bir qaror, har bir fikr, har bir tashabbus – ochiq maydonda, xalq bilan yuzma-yuz aytiladi. Konsepsiya bu tamoyilni qonuniy asosda mustahkamlamoqda.

2. Yechim taklif qilmaydigan tanqid – natijasiz harakatdir

Endi deputat tanqid qiladi, lekin shu bilan birga amaliy taklif kiritadi, tajriba almashadi, xalq bilan hamkorlikda natijaga xizmat qiladi.

3. Mahalla – tuman – viloyat – Senat: muammodan yechimgacha bo‘lgan yo‘l

Bu tizim oddiy, lekin kuchli: muammo qayerda yuzaga kelsa, u yerda hal qilinadi. Boshqaruv esa faqat vertikal emas, gorizontal hamkorlik asosida yuritiladi. Bu — yangi siyosiy madaniyatdir.

🔹 Men bu Konsepsiyani xalq ishonchini oqlash imkoniyati deb bilaman.

U orqali biz deputatlar mas’uliyatimizni his qilamiz – bu ishonchni faqat qonun bilan emas, vijdon bilan oqlashimiz kerak.

🔹 Har bir hududning kelajagi, fuqarolarning turmush sifati, yoshlarning orzulari – bizning faoliyatimizga bog‘liq.

Konsepsiya bizga vakolat berdi – endi bu vakolatni xalq manfaati yo‘lida ishlatish navbatdagi siyosiy sinovimizdir.

 🗣 “Deputatlik – bu lavozim emas, fidoyilik talab qiladigan xizmatdir.”

Shu bois, har bir Kengash a’zosi, har bir xalq vakili bu islohotlarning markazida bo‘lishi, Konsepsiya ruhini amaliyotga aylantirishi shart. Chunki kuchli davlat – kuchli jamiyat asosida barpo etiladi. Kuchli jamiyat esa – faol Kengash, mas’uliyatli deputat va ishonch bilan qaror qabul qiluvchi fuqarodan boshlanadi.

🖊 Imamov Sanjarali To‘lqinovich

Xalq deputatlari Chilonzor tuman Kengashi deputati