munosabat

O‘zbekiston Respublikasi Prezidenti muhtaram Shavkat Mirziyoyevning 2025 yil 19–20 iyun kunlari Qashqadaryo viloyatiga tashrifi viloyatimiz hayotida yangi bosqichni boshlab berdi. Davlatimiz rahbari tomonidan joylarda amalga oshirilayotgan islohotlarning samaradorligi, aholining yashash sharoiti, tadbirkorlik va sanoat salohiyati, ijtimoiy infratuzilmalar holati chuqur tahlil qilindi va ularni yanada takomillashtirish bo‘yicha aniq vazifalar belgilab berildi. 

Ayniqsa, Muborak tumanida amalga oshirilayotgan ishlar va belgilangan ustuvor yo‘nalishlar tumandagi faoliyatimiz uchun yangi istiqbollarni ochmoqda. Prezidentimiz tashabbusi bilan Muborak gazni qayta ishlash zavodi atrofidagi tayyor infratuzilmaga ega, temir yo‘l tarmog‘i o‘tgan 200 gektar maydonda innovasion sanoat zonasi tashkil etilishi belgilandi. 

Bu loyiha tumandagi sanoat salohiyatini to‘liq ro‘yobga chiqarish, yangi ish o‘rinlarini yaratish va yuqori texnologiyali ishlab chiqarishni rivojlantirishga qaratilgan. Davlatimiz rahbari tomonidan ushbu sanoat zonasida klaster tizimi asosida neft-kimyo, elektrtexnika, robototexnika va qurilish materiallari yo‘nalishlari bo‘yicha 5 ta yirik loyihani amalga oshirish vazifasi qo‘yildi. 

Bu esa, Muborak tumani nafaqat Qashqadaryo, balki mamlakatimizdagi muhim industrial markazlardan biriga aylanishiga zamin yaratadi. Sanoat zonasida tashkil etiladigan loyihalar nafaqat yangi ish o‘rinlari yaratish, balki hududda yuqori malakali mutaxassislarni tayyorlash, mahalliy xomashyoni chuqur qayta ishlash va eksportbop mahsulotlar ishlab chiqarish imkonini beradi. 

Deputat sifatida ta’kidlashim joizki, bu kabi keng qamrovli islohotlar va loyihalar mahalliy Kengash deputatlari zimmasiga ham katta mas’uliyat yuklaydi. Biz, xalq vakillari sifatida, tumandagi har bir mahallada ushbu islohotlarning mazmun-mohiyatini aholiga yetkazish, tadbirkorlar va yoshlarni jalb etish, amalga oshirilayotgan ishlar samaradorligini ta’minlashda faol ishtirok etamiz. 

Shu bilan birga, tumanda: 

yoshlarni kasb-hunarga o‘qitish, xotin-qizlar bandligini ta’minlash, infratuzilmalarni yaxshilash, toza ichimlik suvi bilan to‘liq ta’minlash, ta’lim va tibbiyot sifatini oshirish kabi yo‘nalishlarda ham keng qamrovli ishlar amalga oshiriladi. 

Prezidentimizning har bir tashrifi xalqimiz dardini tinglash, joylardagi holatni ochiq-oydin o‘rganish va eng muhimi, xalq bilan birga yechim topishga qaratilgan. Bu – xalqparvarlikning, adolat va taraqqiyotning aniq ifodasidir. Biz esa, ushbu ishonchni oqlash uchun yanada mas’uliyat bilan, jonkuyarlik va fidoyilik bilan xalqimiz xizmatida bo‘lishni davom ettiramiz.  

Xalq deputatlari Muborak tumani Kengashi deputati Abdiyeva Oysuluk Abduraxmonovna