Yig‘ilishda berilgan muhim topshiriqlardan biri — Toshkent shahrida sinovdan o‘tgan “Xalq nazorati” elektron portalini butun respublika bo‘ylab yo‘lga qo‘yish bo‘ldi. Bu — haqiqiy xalq nazoratini ta’minlashda yangi bosqich demakdir. Endilikda har bir fuqaro qurilish, obodonlashtirish, yo‘l, infratuzilma sohasidagi muammolarni fotosurat va aniq manzili bilan mobil ilova orqali davlat idoralariga yuborish imkoniyatiga ega bo‘ladi.

Bu tizimning ochiq va hisobdorlikka asoslangani, uning samaradorligini har kuni baholab borish imkonini yaratadi. Prezidentimiz ta’kidlaganidek, hokimlarning faoliyati aynan shunday murojaatlarga qay darajada tez va sifatli javob berilayotganiga qarab baholanadi.

Bizningcha, bu tashabbus nafaqat fuqarolarning davlat boshqaruvidagi ishtirokini oshiradi, balki mas’ullar zimmasidagi mas’uliyatni ham yanada kuchaytiradi. 

Biz, xalq vakili sifatida, mazkur tizimning tumanimizda to‘liq va samarali ishlashi uchun barcha zarur tashabbuslarni ilgari suramiz va faol ishtirok etamiz.