Xalq deputatlari Andijon shahar Kengashi deputati Tabassumxon Isroilova tashabbusi bilan Andijon shahar “Barkamol” MFYda “Dolzarb 90 kun” loyihasi doirasida mahalla xotin-qizlari va yoshlar ishtirokida ma’naviy-ma’rifiy tadbir tashkil etildi.

Tadbirning asosiy maqsadi — yozgi ta’til kunlarini mazmunli tashkil etish, oilaviy qadriyatlarni mustahkamlash hamda milliy urf-odat va an’analarimizni yosh avlodga yetkazishdan iborat bo‘ldi.

“Mahalla farovonligi uchun!” shiori ostida o‘tkazilgan tadbirda momolarimizdan meros bo‘lib kelayotgan udumlar, milliy taomlar tayyorlash an’analari namoyish etildi. Jumladan, chalpak, cho‘zma non, tandir non, somsa va holvaytar tayyorlash jarayonlarida mahalla ahli faol ishtirok etdi.

Bunday tadbirlar mahallada ahillik va hamjihatlik muhitini yanada mustahkamlash, yoshlarni milliy qadriyatlar ruhida tarbiyalashga xizmat qiladi.