Xalq deputatlari Sardoba tumani Kengashi deputati B.Bekmurdov tomonidan tuman mahalliy byudjetining 2026-yil I-chorak daromadlar rejasining ortirib bajarilgan qismi hisobidan shakllangan mablag‘larni yo‘naltirish to‘g‘risidagi VII-29-49-9-127-K/26-sonli Kengash qarori ijrosi yuzasidan Sardoba tumani madaniyat bo‘limiga ommaviy tadbirlarni tashkil etish va o‘tkazish uchun ajratilgan mablag‘larning maqsadli hamda samarali sarflanishi o‘rganildi.
O‘rganish jarayonida mazkur mablag‘lar hisobidan madaniy-ommaviy tadbirlarni sifatli tashkil etish maqsadida sahna tadbirlari uchun zarur bo‘lgan fonlar hamda madaniy tadbirlarda ishtirok etuvchi raqs jamoalari, bolalar, sozandalar va ertak qahramonlari uchun sahna liboslarini xarid qilishga yo‘naltirilganligi ko‘rib chiqildi.
Shuningdek, ajratilgan mablag‘larning belgilangan maqsadlarga muvofiq sarflanganligi, xarid qilingan jihoz va liboslarning mavjudligi hamda ulardan madaniy tadbirlar jarayonida foydalanilayotganligi tegishli hujjatlar asosida o‘rganildi.
O‘rganish natijasida tuman madaniyat bo‘limiga ajratilgan mablag‘lar ommaviy va madaniy tadbirlarni tashkil etish, ularning badiiy saviyasini oshirish, tadbirlarda ishtirok etuvchi ijodiy jamoalar uchun zarur sharoitlarni yaratish maqsadlariga yo‘naltirilganligi aniqlandi.
Mazkur mablag‘larning maqsadli va samarali sarflanishi aholiga madaniy xizmat ko‘rsatish sifatini oshirish, tumanda o‘tkaziladigan ma’naviy-ma'rifiy va madaniy tadbirlarni mazmunan boyitish hamda ularning ta’sirchanligini ta’minlashda muhim ahamiyat kasb etadi.
Shu bilan birga, byudjet mablag‘laridan foydalanishda qonuniylik, maqsadlilik va shaffoflik tamoyillariga qat’iy rioya etish, xarid qilingan moddiy boyliklarning saqlanishi va ulardan samarali foydalanilishini ta’minlash yuzasidan mas’ullarga tegishli tavsiyalar berildi.