Suyultirilgan gaz ballonlari bilan ta’minlash holati o‘rganildi

Xalq deputatlari Termiz tuman Kengashi 3-Nurafshon saylov okrugi deputati K. Abdullayeva tomonidan o‘zi saylangan Bunyodkor MFY hududida mahalliy Kengash deputati faoliyatining eng muhim yo‘nalishlari bo‘yicha tavsiyalar asosida o‘rganish ishlari olib borildi.

O‘rganish davomida hududdagi xonadonlarni suyultirilgan gaz ballonlari bilan ta’minlash holati yaqindan ko‘zdan kechirildi.

Jumladan, suyultirilgan gaz ballonlarining “FES” tizimi orqali xonadonlarga yetkazib berilishi jarayoni bevosita hududning o‘zida o‘rganildi. Jarayon davomida aholiga gaz ballonlarini yetkazib berishdagi mavjud holat, xizmat sifati va fuqarolarning murojaatlari tahlil qilindi.

Shuningdek, deputat tomonidan fuqarolar bilan bevosita muloqot qilinib, ularning murojaatlari va muammolari tinglandi. Aholini suyultirilgan gaz bilan uzluksiz ta’minlash, aniqlangan muammolarni o‘z vaqtida bartaraf etish yuzasidan tegishli tavsiya va takliflar bildirildi.

Aholi murojaatlarini joyiga chiqib o‘rganish va mavjud muammolarni amaliy hal etish — deputatlik faoliyatining muhim yo‘nalishlaridan biridir.