O‘zbekiston Xalq demokratik partiyasidan saylangan Xalq deputatlari Shayxontohur tuman Kengashi deputati M. Raxmatillayeva tomonidan tuman Kengashining inklyuziv ta’limni rivojlantirish to‘g‘risidagi qarori ijrosi yuzasidan o‘rganish ishlari olib borildi.
Mazkur o‘rganishda Xalq deputatlari Toshkent shahar Kengashi deputati A. Ibragimov hamda tuman Kengashi kotibiyati bosh mutaxassisi M. Yo‘ldoshxo‘jayeva ishtirok etdi.
O‘rganish davomida Shayxontohur tumanidagi 254-sonli umumiy o‘rta ta’lim maktabida imkoniyati cheklangan bolalarni ta’lim jarayoniga jalb etish, ularning jamiyatga moslashuvi, tengdoshlari bilan muloqotini rivojlantirish hamda ular uchun yaratilgan shart-sharoitlar holati o‘rganildi.
Shuningdek, inklyuziv ta’limni tashkil etish jarayonida mavjud muammolar, ularni bartaraf etish bo‘yicha amalga oshirilayotgan ishlar hamda kelgusidagi vazifalar yuzasidan mas’ullar bilan fikr almashildi.
Inklyuziv ta’limni rivojlantirish — har bir bolaning ta’lim olish huquqini ta’minlash, uning jamiyatda munosib o‘rin egallashi va to‘laqonli hayot kechirishi uchun zarur shart-sharoitlarni yaratishning muhim yo‘nalishlaridan biridir.