Xalq deputatlari Qo‘qon shahar Kengashi raisi va deputati F.Mamajonov tomonidan fuqarolar murojaati asosida navbatdagi deputatlik so‘rovi yuborildi.

Deputatning "Aziztepa" mahalla fuqarolar yig‘inida saylovchilar bilan o‘tkazgan uchrashuvi davomida Aziztepa ko‘chasida istiqomat qiluvchi aholi tomonidan uzoq yillardan buyon foydalanib kelinayotgan kanalizatsiya quvurlarining yaroqsiz holga kelgani, buning natijasida sanitariya-gigiyena talablariga salbiy ta’sir ko‘rsatayotgani hamda aholi uchun noqulayliklar yuzaga kelayotgani yuzasidan murojaat bildirildi.

Mazkur murojaat yuzasidan O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonuni talablariga muvofiq, Qo‘qon shahar hokimining qurilish, to‘siqsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari nomiga deputatlik so‘rovi yuborildi.

Deputatlik so‘rovida "Aziztepa" MFY hududidagi Aziztepa ko‘chasida yangi kanalizatsiya quvurlarini o‘rnatish bo‘yicha amalga oshiriladigan chora-tadbirlar, ishlarning bajarilish muddati hamda ushbu masala yuzasidan asoslantirilgan ma’lumot taqdim etish so‘ralgan.

Mazkur masala deputat nazoratiga olingan bo‘lib, uning ijrosi yuzasidan amalga oshirilayotgan ishlar va natijalar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi