O‘rganish jarayonida, xususan, oilalarda ajrimlarning oldini olish, xotin-qizlarni ijtimoiy qo‘llab-quvvatlash, oilaviy muammolarni barvaqt aniqlash hamda ularni bartaraf etish yuzasidan mahalla mutasaddilari tomonidan amalga oshirilayotgan ishlar bilan tanishildi.

Ta’kidlanganidek, jamiyatda mustahkam oilalarni shakllantirish va ajrimlarning oldini olish bugungi kunning eng muhim ijtimoiy vazifalaridan biridir.

Shu bois mahallalarda profilaktik targ‘ibot-tashviqot ishlari, oilaviy nizolarni erta bosqichda bartaraf etish, xotin-qizlarga huquqiy, psixologik va ijtimoiy ko‘mak ko‘rsatish bo‘yicha tizimli ishlar olib borilmoqda.

Ajrimlarning asosiy sabablari sifatida uchinchi shaxslarning oilaviy munosabatlarga aralashuvi, moddiy qiyinchiliklar, er-xotin o‘rtasidagi ishonchning yo‘qolishi va xiyonat, oilaviy zo‘ravonlik, shuningdek, yoshlarning oilaviy hayotga yetarli darajada tayyor emasligi qayd etildi.

Deputat tomonidan ushbu yo‘nalishdagi ishlar samaradorligini yanada oshirish, oilalar bilan manzilli ishlash hamda ajrimlarning oldini olishga qaratilgan chora-tadbirlarni izchil davom ettirish yuzasidan tegishli tavsiyalar berildi.