Xalq deputatlari Qibray tuman Kengashiga, O‘zbekiston Xalq demokratik partiyasidan saylangan deputatlar B.Usmonov, G.To‘xtanazarova, U.Noraliyev hamda partiyaning Qibray tuman Kengashi raisi X.Avazmatov ishtirokida “Botanika” mahallasida yoshlar bilan uchrashuv tashkil etildi.

Uchrashuv davomida yoshlarning muammo va takliflari tinglanib, ularni qiynayotgan dolzarb masalalar yuzasidan ochiq muloqot olib borildi. Xususan, bandlikni ta’minlash, tadbirkorlik faoliyatini boshlash uchun yaratilayotgan imkoniyatlar, ta’lim va kasb-hunar o‘rganish masalalari muhokama markazida bo‘ldi.

Shu bilan birga, uchrashuvda yoshlar uchun qisqacha tarzda siyosiy-huquqiy tushunchalar ham berilib, partiya faoliyati, Xalq deputatlari Kengashining vazifalari hamda deputatlarning asosiy majburiyatlari haqida batafsil ma’lumotlar yetkazildi.

Shuningdek, yoshlarga qaratilgan davlat dasturlari, imtiyoz va qo‘llab-quvvatlash mexanizmlari haqida tushuntirishlar berilib, ularning ijtimoiy faolligini oshirish, jamiyat hayotida munosib o‘rin egallashlari yuzasidan tavsiyalar bildirildi.

Uchrashuv yakunida yoshlar tomonidan bildirilgan murojaat va takliflar tegishli tartibda ko‘rib chiqilishi hamda ijobiy hal etilishi nazoratga olinishi ta’kidlandi.