Ko‘p qavatli uylarda liftlar holati o‘rganildi

Xalq deputatlari Navoiy shahar Kengashi deputatlari N. Irgasheva, N. Xudayqulova, G. Xasanova va M. Eshniyozovlar tomonidan Navoiy shahridagi “Humo” mahalla fuqarolar yig‘ini hududida joylashgan ko‘p qavatli uylardagi liftlarning texnik holati va ularning uzluksiz ishlashini ta’minlash masalalari o‘rganildi.

Mazkur o‘rganish ishlari “Mustang Oq Tulpor” boshqaruv servis kompaniyasi va mutasaddi tashkilotlar vakillari bilan hamkorlikda amalga oshirildi. Unda ko‘p qavatli uylarda istiqomat qilayotgan aholi uchun muhim bo‘lgan lift xo‘jaligining bugungi holati, ularning texnik xizmat ko‘rsatish sifati hamda xavfsizlik talablariga rioya etilishi masalalariga alohida e’tibor qaratildi.

O‘rganish jarayonida deputatlar bir qator uylarda bo‘lib, liftlarning ishlash holatini joyida ko‘zdan kechirdilar. Shuningdek, aholi bilan muloqot o‘tkazilib, ularning bu boradagi fikr-mulohazalari va mavjud muammolari tinglandi. Ayrim holatlarda liftlarning eskirgani, ehtiyot qismlar ta’minotidagi uzilishlar va profilaktik xizmat ko‘rsatish ishlarining o‘z vaqtida bajarilmayotgani qayd etildi.

Shu bilan birga, mas’ul tashkilotlar tomonidan liftlarni bosqichma-bosqich ta’mirlash, zamonaviylashtirish hamda ularning xavfsizligini ta’minlash bo‘yicha amalga oshirilayotgan ishlar yuzasidan ma’lumotlar taqdim etildi. Deputatlar esa aniqlangan kamchiliklarni bartaraf etish, liftlarning uzluksiz va xavfsiz ishlashini ta’minlash bo‘yicha tegishli ko‘rsatmalar berib, bu masala doimiy nazoratda bo‘lishini ta’kidladilar.

Ta’kidlanishicha, ko‘p qavatli uylarda liftlarning barqaror ishlashi aholining kundalik hayotida muhim ahamiyat kasb etadi. Shu bois, ushbu yo‘nalishda amalga oshirilayotgan ishlar sifatini oshirish, xizmat ko‘rsatish tizimini yanada takomillashtirish va aholi murojaatlariga tezkorlik bilan javob qaytarish ustuvor vazifalardan biri hisoblanadi.

Mazkur o‘rganish tadbiri aholi uchun qulay va xavfsiz yashash muhitini yaratish, kommunal xizmatlar sifatini oshirish hamda sohadagi mavjud muammolarni bartaraf etishga qaratilgan muhim amaliy qadam bo‘ldi.