Xalq deputatlari Chilonzor tumani Kengashi deputati Saidov Ulug‘bek Aripovich tomonidan tuman hokimining qurilish, to‘siqlarsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari nomiga deputat so‘rovi yuborildi.

Deputatlik okrugidagi “Ko‘tarma” mahallasida olib borilgan o‘rganishlar davomida 14, 19 va 20-sonli ko‘p qavatli uylar atrofidagi ichki yo‘llar tuman elektr tarmoqlari tomonidan kavlanganligi hamda ushbu hududlar qayta asfaltlanmasdan qoldirilganligi aniqlandi.

Mazkur yo‘llar maktabga olib boruvchi asosiy qatnov yo‘llari bo‘lib, o‘quvchi bolalar hamda hududda yashovchi fuqarolar uchun jiddiy noqulayliklar tug‘dirmoqda.

Shu munosabat bilan, “Xalq deputatlari viloyat, tuman va shahar Kengashi deputatining maqomi to‘g‘risida”gi O‘zbekiston Respublikasi Qonunining 5 va 8-moddalariga asosan, masala yuzasidan asoslantirilgan tushuntirish berish yoki tegishli choralar ko‘rish yuzasidan munosabat bildirish so‘raldi.