O‘zbekiston Respublikasi Davlat mustaqilligining 35 yilligi munosabati bilan yurtimiz bo‘ylab amalga oshirilayotgan keng ko‘lamli obodonlashtirish va sanitariya-tozalash ishlari doirasida Zomin tumanidan o‘tuvchi temir yo‘l hududida ham keng qamrovli tozalash tadbirlari tashkil etildi.

Tadbir davomida temir yo‘l atrofidagi hududlar chiqindilardan tozalanib, begona o‘tlar o‘rib tashlandi, yo‘l yoqalari tartibga keltirildi hamda hududning sanitariya holatini yaxshilash bo‘yicha zarur obodonlashtirish ishlari amalga oshirildi. Shuningdek, temir yo‘l bo‘ylab xavfsizlik va ekologik tozalikni ta’minlashga alohida e’tibor qaratildi.

Obodonlashtirish tadbirlarida tegishli tashkilotlar xodimlari, tuman kengashi deputatlari, mahalla faollari hamda ko‘ngillilar faol ishtirok etib, hududning yanada ozoda va ko‘rkam bo‘lishiga munosib hissa qo‘shdilar.

Mazkur obodonlashtirish va sanitariya-tozalash ishlari hududning ekologik holatini yaxshilash, temir yo‘l infratuzilmasi atrofida ozodalikka rioya etish hamda Mustaqillik bayramini munosib kutib olishga xizmat qilmoqda.