MUSTAQILLIKNING 35 YILLIGI OLDIDAN NAVOIY SHAHRIDA OBODONLASHTIRISH ISHLARI O‘RGANILMOQDA


O‘zbekiston Respublikasi davlat mustaqilligining 35 yilligi umumxalq bayramiga tayyorgarlik ko‘rish doirasida Navoiy shahrida keng ko‘lamli obodonlashtirish, ko‘kalamzorlashtirish va bunyodkorlik ishlari amalga oshirilmoqda. Mazkur ishlarning borishi ustidan deputatlik nazoratini olib borish maqsadida Xalq deputatlari Navoiy shahar Kengashi deputati Ergashev Dilmurod Bekmuradovich Alisher Navoiy nomidagi Markaziy madaniyat va istirohat bog‘ida olib borilayotgan ishlar bilan yaqindan tanishdi.

Tashrif davomida bog‘ hududida daraxt va manzarali butalarni parvarishlash, sug‘orish tizimini yaxshilash, gulzorlarni tartibga keltirish, piyodalar yo‘laklari hamda dam olish maskanlarini obodonlashtirish, sanitariya-tozalash ishlari va mavjud infratuzilma obyektlarini ta’mirlash jarayonlari ko‘zdan kechirildi.

Deputat tomonidan amalga oshirilayotgan ishlarning sifati, belgilangan muddatlarda yakunlanishi hamda bajarilayotgan bunyodkorlik tadbirlarining samaradorligiga alohida e’tibor qaratildi. O‘rganishlar davomida mas’ul tashkilotlar vakillari bilan hududni yanada obod qilish, yashil maydonlarni kengaytirish, sug‘orish tizimining samaradorligini oshirish hamda bog‘ning sanitariya holatini doimiy nazoratda saqlash masalalari muhokama qilindi.

Shuningdek, istirohat bog‘iga tashrif buyuruvchilar uchun qulay va xavfsiz sharoit yaratish, hududning estetik ko‘rinishini yanada yaxshilash hamda amalga oshirilayotgan ishlarni belgilangan muddatlarda va sifatli yakunlash yuzasidan mas’ullarga tegishli tavsiya va ko‘rsatmalar berildi.

Ta’kidlash joizki, Mustaqillik bayrami arafasida Navoiy shahrining barcha hududlarida obodonlashtirish, ko‘kalamzorlashtirish, sanitariya-tozalash va bunyodkorlik ishlari izchil davom ettirilmoqda. Bu kabi tadbirlar shahar infratuzilmasini yanada rivojlantirish, ekologik muhitni yaxshilash hamda aholiga qulay va zamonaviy sharoitlar yaratishga xizmat qilmoqda.