Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston “Adolat” sotsial-demokratik partiyasidan saylangan deputat M.Ashurov tomonidan tumanning “Daxana” mahallasiga biriktirilgan yoshlar yetakchisi J.O‘rmanov faoliyati o‘rganildi.

O‘rganish davomida mahalladagi uyushmagan yoshlar bilan ishlash tizimi, “Yoshlar daftari”ga kiritilgan fuqarolar muammolarini hal etish, kasb-hunarga o‘qitish, doimiy va mavsumiy ish bilan ta’minlash yuzasidan ko‘rilayotgan choralar yuzasidan ma’lumotlar o‘rganildi. Shuningdek, tadbirkorlik qilish istagida bo‘lgan yoshlarga imtiyozli kreditlar ajratish, o‘zini o‘zi band qilish dasturlariga jalb etish hamda kasbiy ko‘nikmalarini oshirishga qaratilgan ishlar muhokama qilindi.

O‘rganish jarayonida yoshlarning bo‘sh vaqtini mazmunli tashkil etish maqsadida sport musobaqalari, kitobxonlik tadbirlari, ma’naviy-ma’rifiy uchrashuvlar, intellektual tanlovlar va madaniy tadbirlarni muntazam o‘tkazish holati tahlil qilindi. Mavjud to‘garaklar faoliyati, ularga yoshlarni jalb qilish darajasi hamda infratuzilma imkoniyatlariga alohida e’tibor qaratildi.

O‘rganish yakunlari bo‘yicha yoshlar bilan ishlash samaradorligini yanada oshirish, uyushmagan yoshlarni to‘liq xatlovdan o‘tkazish, ularni manzilli qo‘llab-quvvatlash, bo‘sh vaqtni mazmunli tashkil etishga qaratilgan tadbirlar qamrovini kengaytirish hamda bandlikni ta’minlash bo‘yicha amaliy chora-tadbirlarni kuchaytirish yuzasidan tegishli tavsiyalar va takliflar bildirildi.