ТИББИЙ ХИЗМАТ КЎРСАТИШ СИФАТИ ЎРГАНИЛДИ

Халқ депутатлари Янгиқўрғон тумани Кенгаши депутати Юлдашев Ғолибжон Турғунпўлатович томонидан сайлов округида жойлашган Тиллатепа қишлоқ врачлик пункти (ҚВП)да аҳолига кўрсатилаётган тиббий хизматлар ҳолати ўрганилди.

Ташриф давомида ҚВПда яратилган шарт-шароитлар, тиббий хизмат кўрсатиш сифати, аҳолига кўрсатилаётган профилактик ва даволаш ишлари кўздан кечирилди. Шунингдек, фуқароларга бепул дори-дармонларни етказиб бериш ва тарқатиш жараёни ҳам ўрганилди.

Ўрганиш жараёнида аҳоли билан мулоқот қилиниб, уларнинг тиббий хизматлардан фойдаланиш даражаси, мавжуд муаммолар ва таклифлари тингланди. Фуқаролар томонидан билдирилган фикрлар асосида хизмат сифатини янада ошириш, дори-дармон таъминотини яхшилаш бўйича тегишли таклиф ва тавсиялар билдирилди.

Ташриф якунида тиббиёт муассасаси фаолиятини янада такомиллаштириш, аҳолига сифатли ва ўз вақтида тиббий хизмат кўрсатишни таъминлаш юзасидан масъулларга тегишли вазифалар белгиланди.