#deputat_faoliyati

Xalq deputatlari Toshkent viloyati Kengashi deputati Danagul Xibrayeva tomonidan Yuqori Chirchiq tumani “Oqovul” mahalla fuqarolar yig‘inida ijtimoiy xodim Gulchehra Saparbayevaning faoliyati hamda aholining ijtimoiy ehtiyojmand qatlamlariga ko‘rsatilayotgan xizmatlar sifati o‘rganildi.

O‘rganish davomida kam ta’minlangan oilalar, yolg‘iz keksalar, nogironligi bo‘lgan shaxslar, boquvchisini yo‘qotgan fuqarolar va boshqa ijtimoiy himoyaga muhtoj toifalarga ko‘rsatilayotgan ijtimoiy xizmatlarning holati tahlil qilindi. Xususan, ijtimoiy nafaqalar va moddiy yordamlarni tayinlash hamda to‘lash jarayonlarining amaldagi qonunchilik talablari asosida tashkil etilishi, murojaatlarning o‘z vaqtida ko‘rib chiqilishi va ko‘rsatilayotgan yordamlarning manzilliligi masalalariga alohida e’tibor qaratildi.

Shuningdek, mahallada ehtiyojmand oilalarni aniqlash, ularning muammolarini o‘rganish, individual reja asosida ijtimoiy qo‘llab-quvvatlash choralarini ko‘rish hamda fuqarolarning turmush sharoitini yaxshilashga qaratilgan ishlar yuzasidan mas’ullar bilan muloqot o‘tkazildi. Fuqarolar bilan suhbatlar davomida ularga yaratilayotgan imkoniyatlar, davlat tomonidan berilayotgan ijtimoiy yordam turlari va ularni olish tartiblari haqida ham fikr almashildi.

Deputat tomonidan ijtimoiy xizmatlar sifatini yanada oshirish, ijtimoiy himoyaga muhtoj fuqarolarning murojaatlariga tezkor va samarali yechim topish, ajratilayotgan nafaqa hamda moddiy yordamlarning shaffofligi va manzilliligini ta’minlash yuzasidan tegishli tavsiyalar berildi. Mazkur yo‘nalishdagi ishlar natijadorligi deputatlik nazoratiga olinib, aholining ijtimoiy himoyasini kuchaytirishga qaratilgan chora-tadbirlarni izchil davom ettirish zarurligi ta’kidlandi.

📱 Telegram 📱 Instagram 📱 Facebook