🏃‍♂️ DEPUTATLIK NAZORATI: MAKTABDA SPORT INFRASTRUKTURASI HOLATI O‘RGANILDI.

📍 Bugungi ish rejasiga muvofiq, O‘zbekiston Respublikasining “Jismoniy tarbiya va sport to‘g‘risida”gi Qonuni (2026-yil 24-martdagi O‘RQ-1123-son) ijrosi yuzasidan biriktirilgan deputat O.Jumanazarov tomonidan Muqimiy mahallasida joylashgan 12-sonli umumiy o‘rta ta’lim maktabida o‘rganish ishlari olib borildi.

⚽️ O‘rganishning asosiy yo‘nalishi — maktab hududida qurilayotgan mini futbol maydonchasining holati, uning foydalanishga tayyorlik darajasi, o‘quvchilar uchun yaratilayotgan shart-sharoitlar hamda sport inshootidan samarali foydalanish imkoniyatlarini baholashdan iborat bo‘ldi.

⚠️ ANIQLANGAN MUAMMO
O‘rganish jarayonida mini futbol maydonchasidan foydalanish uchun zarur bo‘lgan qo‘shimcha infratuzilma yetarli darajada ko‘zda tutilmagani, xususan, sport maydonchasidan foydalanuvchilar uchun yuvinish va kiyim almashtirish xonalari mavjud emasligi aniqlandi.

🏫 Mazkur holat sport maydonchasidan to‘liq va qulay foydalanishga, ayniqsa o‘quv mashg‘ulotlari hamda sport tadbirlarini muntazam tashkil etishga ma’lum darajada noqulaylik tug‘dirishi mumkin. Shu sababli mini futbol maydonchasi bilan bir qatorda sport bilan shug‘ullanuvchilar uchun zarur bo‘lgan sanitariya-gigiyena sharoitlari, kiyim almashtirish va yuvinish xonalarini tashkil etish imkoniyatlarini ko‘rib chiqish zarurligi qayd etildi.

💡 MAKTAB RAHBARIYATI TOMONIDAN TAKLIF
O‘rganish davomida maktab direktori tomonidan o‘quvchilarning sportga bo‘lgan qiziqishini yanada oshirish, turli yoshdagi o‘quvchilarni jismoniy faollikka keng jalb etish maqsadida maktab hududida “Workout” maydonchasini tashkil etish taklifi bildirildi.
🏋️‍♂️ Mazkur taklifni amalga oshirish orqali o‘quvchilarning nafaqat futbol, balki boshqa jismoniy mashqlar bilan ham muntazam shug‘ullanishi uchun qo‘shimcha imkoniyat yaratish, sportning ommaviyligini oshirish hamda maktab hududidagi mavjud sport infratuzilmasidan samarali foydalanish mumkinligi ta’kidlandi.
📌 TAKLIF VA TAVSIYALAR
O‘rganish yakunlari bo‘yicha:
🔹 sport maydonchasidan foydalanuvchilar uchun yuvinish va kiyim almashtirish xonalarini tashkil etish imkoniyatlarini ko‘rib chiqish;
🔹 maktab direktori tomonidan bildirilgan “Workout” maydonchasi tashkil etish taklifini tegishli tartibda o‘rganish;
🔹 sport maydonchasidan foydalanish bo‘yicha xavfsizlik va sanitariya-gigiyena talablariga rioya etilishini ta’minlash yuzasidan mas’ullarga tegishli tavsiyalar berildi.

📣 Deputatlik nazorati — sport sohasidagi qonun hujjatlari ijrosini ta’minlash, aniqlangan muammolarni o‘rganish va ularni amaliy hal etishga ko‘maklashishning muhim vositasidir.