Xalq deputatlari Sardoba tumani Kengashi raisi R.Tashpulatov hamda tuman Kengashi deputati G.Suvonqulova ishtirokida Birlashgan mahallasida kiberxavfsizlikni ta’minlash va yoshlar o‘rtasida huquqbuzarlik hamda jinoyatchilikning oldini olish masalalariga bag‘ishlangan targ‘ibot yig‘ilishi tashkil etildi.
Tadbir davomida axborot texnologiyalari jadal rivojlanayotgan bugungi kunda internet tarmog‘idan xavfsiz foydalanish, kiberjinoyatlarning turlari, internet firibgarligi va shaxsiy ma’lumotlarni himoya qilish bo‘yicha ishtirokchilarga atroflicha tushunchalar berildi. Shuningdek, yoshlarni turli yot g‘oyalar va salbiy axborot xurujlaridan asrash, ularning huquqiy savodxonligini oshirish masalalari muhokama qilindi.
Yig‘ilishda yoshlar o‘rtasida huquqbuzarlik va jinoyatchilikning oldini olish, bo‘sh vaqtni mazmunli tashkil etish, ta’lim va tarbiya masalalariga alohida e’tibor qaratildi. Mutasaddilar tomonidan bu borada amalga oshirilayotgan ishlar haqida ma’lumot berilib, ota-onalar, mahalla faollari va jamoatchilikning hamkorligi muhim ahamiyatga ega ekani ta’kidlandi.
So‘zga chiqqanlar tomonidan yoshlarni vatanparvarlik ruhida tarbiyalash, ularning bilim olishi va kasb-hunar egallashi uchun munosib shart-sharoitlar yaratish, shuningdek, huquqbuzarliklarga qarshi murosasiz munosabatni shakllantirish har birimizning muhim vazifamiz ekani qayd etildi.
Tadbir yakunida ishtirokchilar tomonidan bildirilgan fikr va takliflar tinglanib, aholi va yoshlar bilan bu kabi profilaktik uchrashuvlarni muntazam ravishda tashkil etish bo‘yicha kelishib olindi.

🗯Bunday tadbirlar jamiyatda huquqiy madaniyatni yuksaltirish, kiberxavfsizlikni ta’minlash va yoshlar o‘rtasida sog‘lom muhitni shakllantirishga xizmat qiladi.