Belgilengen is-reje tiykarında Xalıq deputatları Bozataw rayonlıq Keńesiniń Korrupciyaǵa qarsı gúresiw, sociallıq taraw, jaslar siyasatı, mádeniyat hám sport máseleleri boyınsha turaqlı komissiyasına xalıqtıń sociallıq jaǵdayın jaqsılaw, hayal-qızlardı qollap-quwatlaw hám mámleketlik baǵdarlamalardıń orınlanıwına arnalǵan náwbettegi májilis bolıp ótti.

Májilis kún tártibinde rayon turmısı ushın áhmiyetli bolǵan bir neshe áhmiyetli máseleler kórip shıǵıldı.

Májiliste dáslep rayon hákimi orınbasarı, Shańaraq hám hayal-qızlar bólimi baslıǵı A.Xojageldievanıń 2026-jıldıń I sheregi dawamında ámelge asırǵan jumısları boyınsha esabatı tıńlandı.

Esabatqa kóre: Ótken úsh ay dawamında "Hayal-qızlar dápteri"ndegi puqaralar menen anıq dárejede islesilip, olardıń bántligin támiyinlew hám kásip-ónerge jóneltiriw boyınsha sezilerli nátiyjelerge erisilgen. Shańaraqlardaǵı sociallıq-ruwxıy ortalıqtı jaqsılaw hám awır jaǵdayǵa túsip qalǵan hayal-qızlarǵa huqıqıy hám psixologiyalıq járdem kórsetiw sapası jańa basqıshqa kóterilgenligi atap ótildi.

Kún tártibindegi ekinshi másele boyınsha rayon prokurorınıń málimlemesi tıńlandı. Bunda Ózbekstan Respublikası Prezidentiniń PQ-1 hám PQ-2-sanlı qararlarınıń rayondaǵı orınlanıwı talqılandı.

Prokuratura tárepinen ótkerilgen monitoring nátiyjeleri qararlarda belgilengen tapsırmalardıń orınlanıwı boyınsha qatań qadaǵalaw ornatılǵanlıǵın kórsetedi. Kemshiliklerge jol qoyǵan juwapkerlerge tiyisli kórsetpeler berilip, reformalardıń xalıq turmısına tásirin arttırıw boyınsha anıq wazıypalar belgilendi.

Májiliste sonıń menen birge, Ministrler Kabinetiniń 596-sanlı qararı tiykarında "Sociallıq qorǵawdıń birden-bir reestri" málimleme sistemasın engiziw barısı kórip shıǵıldı.

Kem támiyinlengen shańaraqlardı anıqlaw hám olarǵa sociallıq napaqalar tayınlaw tolıq elektron tárizde ámelge asırılmaqta. Bul bolsa korrupciyanıń aldın alıw, insan faktori tásirin kemeytiw hám járdemge mútáj shańaraqlardı ádil anıqlaw imkaniyatın bermekte. Rayon hákimligi hám tiyisli taraw wákilleri bul sistemanıń eń shetki awıllarda da sapalı islewin támiyinlew tapsırıldı.

Májilis sońında kún tártibindegi barlıq máseleler boyınsha tiyisli qararlar qabıllandı. bul baǵdardaǵı jumıslardı ele de jedellestiriw hám xalıq razılıǵına erisiw baslı maqset ekenligi atap ótildi.