Xalq deputatlari Muzrabot tuman Kengashi sessiyasida har chorakda deputatlarning saylovchilar oldida o‘z faoliyati yuzasidan axborot berishi bo‘yicha reja-grafik tasdiqlangan. Mazkur grafik asosida bugun Muzrabot tumani hokimi – xalq deputatlari tuman Kengashiga 21-Guliston saylov okrugidan saylangan deputat Mamatqulov Abdulla Abdimo‘minovich “Guliston” mahallasida saylovchilar bilan uchrashuv o‘tkazdi.

Uchrashuv avvalida deputat 2025-yil davomida amalga oshirilgan deputatlik faoliyati haqida batafsil axborot berdi. Jumladan, tumandagi ichki yo‘llarni bosqichma-bosqich ta’mirlash, asfalt qoplamasi yotqizish ishlari sifatli tashkil etilayotgani ta’kidlandi.

Belgilangan reja asosida joriy yilda tumandagi 400 kilometr ichki yo‘llarni asfaltlash ishlari amalga oshirilishi, ushbu rejaga “Guliston” mahallasidagi yo‘llar ham kiritilgani aytib o'tildi.

Shuningdek, mahallada elektr energiyasi ta’minotini yaxshilash borasida olib borilayotgan ishlar haqida ham atroflicha to‘xtalib o‘tildi. Aholining farovon yashashi yo‘lida davlatimiz rahbari e’tibori va qo‘llab-quvvatlovi bilan amalga oshirilayotgan bunyodkorlik ishlari alohida qayd etildi.

Uchrashuv davomida fuqarolar tomonidan qator murojaatlar bildirildi. Xususan, elektr energiyasi ta’minoti, maishiy gaz ballonlarini o‘z vaqtida va sifatli yetkazib berish, chiqindilarni belgilangan kunlarda olib chiqish, ariqlarda oqar suv ta’minoti kabi masalalar ko‘tarildi. Ayrim murojaatlar joyiga chiqib o‘rganildi.

Deputat saylovchilar tomonidan bildirilgan masalalarni diqqat bilan ko‘rib chiqib, tegishli tushuntirish va tavsiyalar berdi. Qo‘shimcha o‘rganish talab etiladigan murojaatlar deputatlik nazoratiga olinishi belgilandi hamda uchrashuvda ishtirok etgan tegishli tashkilot rahbarlariga aniq topshiriqlar berildi.

Yig‘ilish yakunida bunday uchrashuvlar har chorakda muntazam ravishda o‘tkazib borilishi ma’lum qilindi.