“Uyma-uy” loyihasi doirasida ijtimoiy himoyaga muhtojlar e’tiborda:

Joriy yilning 31-oktabr kuni O‘zbekiston Xalq demokratik partiyasi Termiz tuman Kengashi raisi, xalq deputatlari tuman kengashi deputati G. Shafoatova hamda mahalla yettiligi vakillari “Yangi hayot” mahallasida istiqomat qiluvchi ijtimoiy himoyaga muhtoj oilalardan birining holidan xabar olishdi.

Uchrashuv davomida 1971-yilda tug‘ilgan, II-guruh nogironi U. Doniyorovaning yashash sharoiti, sog‘ligi va ijtimoiy holati o‘rganildi. Uchrashuv chog‘ida nogironligi sababli kundalik turmushda qiynalayotgani, uyda ko‘makka muhtojligi aniqlandi.

Holat o‘rganilgach, “Inson” ijtimoiy xizmatlar markazi tomonidan U. Doniyorovaga bir million so‘m miqdorida moddiy yordam ko‘rsatildi. Shuningdek, uning harakatlanishini yengillashtirish maqsadida maxsus “Xodunog” yurish moslamasi hamda oziq-ovqat mahsulotlari yordam tariqasida yetkazib berildi.

Mazkur tashrif davomida aniqlangan muammolar asosida takliflar ishlab chiqildi. Deputat G. Shafoatova tomonidan muammolar yechimi yuzasidan mas’ul idoralarga deputatlik so‘rovlari kiritilib, tegishli chora-tadbirlar ko‘rilishi ustidan doimiy deputatlik nazorati o‘rnatildi.

Bu tashabbus ijtimoiy himoyaga muhtoj fuqarolarga amaliy yordam berish, ularning hayot sifatini yaxshilashga qaratilgan muhim qadamlardan biri bo‘lib, “Uyma-uy” loyihasi doirasida olib borilayotgan ishlarga yaqqol misol bo‘la oladi.