Joriy yilning 25-noyabr kuni Parkent tuman hokimligi katta majlislar zalida Xalq deputatlari Parkent tuman Kengashining navbatdan tashqari sessiyasi bo‘lib o‘tdi. Sessiya ishida Toshkent viloyati hokimi Z.Mirzayev, Xalq deputatlari Toshkent viloyati Kengashi raisi S.Fayziyeva, viloyat va tuman Kengashi deputatlari, hokim o‘rinbosarlari, tegishli tashkilot mutasaddilari hamda OAV vakillari ishtirok etishdi. Sessiyada tashkiliy masala ko‘rildi. Tuman hokimi lavozimida ishlab kelgan Isoqulov Sardor Dadajonovich boshqa ishga o‘tishi munosabati bilan tuman hokimi lavozimidan ozod qilindi hamda viloyat hokimi Elmurod Po‘latov nomzodini Parkent tuman hokimi lavozimiga tavsiya qildi. Deputatlar nomzodning yaqin istiqboldagi faoliyatiga doir taqdimot bilan tanishdilar. Xalq deputatlari Parkent tumani Kengashining qarori bilan Elmurod Po‘latov Parkent tumani hokimi etib tayinlandi.Shuningdek sessiyada tuman Kengashi deputatlari X.Muxitdinov va Y.Uboydullayeva Parkent tuman hokimi sifatida faoliyatini yakunlab Bo‘ka tumanida hokim lavozimida ish boshlagan S.Isakulovga hokim bo‘lib ishlagan davri uchun minnatdorchilik bildirib, yangi tayinlagan hokim E. Po‘latovga kelgusi ishlarida ulkan zafarlar tilab, deputatlar jamoasi doimo yonida kamarbasta bo‘lishini aytib o`tishdi.