Инвестиция дастурига киритилган объектларни жойига чиқиб ўрганилди.

Ўзбекистон Республикаси Президентининг 2025 йил 27 декабрдаги “2026–2028 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги ПҚ–393-сонли қарорига мувофиқ, Янгиқўрғон туманида 5 та объектда қурилиш ва реконструкция ишларини амалга ошириш белгиланган.

Мазкур мақсадлар учун жами 51,4 млрд сўм бюджет маблағлари йўналтирилиши кўзда тутилган.

Жумладан, тумандаги 48-умумтаълим мактабини реконструкция қилиш ҳам режалаштирилган. Лойиҳа доирасида 180 ўринли мавжуд бино таъмирланиб, қўшимча яна 180 ўринли янги ўқув биноси барпо этилади. Ушбу лойиҳанинг умумий қиймати 6 млрд сўмни ташкил этади.

Халқ депутатлари Янгиқўрғон туман Кенгаши депутати Эргашева Мунисхон Рустамбековна ҳамда Кенгаш котибияти мутахассиси Ходжаева Басида мазкур таълим муассасасида бўлиб, реконструкция ишлари ва янги бино қурилиши жараёнлари билан яқиндан танишди.

Ташриф давомида лойиҳани сифатли ва белгиланган муддатларда амалга ошириш, қурилиш ишларини самарали ташкил этиш, ўқувчилар учун хавфсиз ва замонавий шарт-шароитлар яратиш масалаларига алоҳида эътибор қаратилди.