Маҳаллий давлат ҳокимиятини ривожлантириш:

Президент фармони ва 2030 йилгача бўлган истиқболлар

Сўнгги йилларда Ўзбекистонда амалга оширилаётган кенг кўламли сиёсий ва ижтимоий ислоҳотлар мамлакатни янги босқичга олиб чиқмоқда. Айниқса, маҳаллий давлат ҳокимияти ва вакиллик органларининг фаолиятини такомиллаштириш, аҳоли билан очиқ мулоқотни кучайтириш ҳамда халқ манфаатларига хизмат қиладиган бошқарув тизимини яратиш масалалари устувор аҳамият касб этмоқда. 

Шу нуқтаи назардан, 2024 йил 17 май куни қабул қилинган “Ўзбекистон Республикасида маҳаллий давлат ҳокимияти ва вакиллик органлари фаолиятини 2030 йилга қадар ривожлантириш концепциясини тасдиқлаш тўғрисида”ги Президент Фармони тарихий аҳамиятга эга ҳуқуқий ҳужжатдир.

Президент томонидан қабул қилинган мазкур фармон маҳаллий давлат ҳокимияти тизимини тубдан ислоҳ қилиш, уни самарали ва халқчил тарзда ташкил этишга йўналтирилган. 

Фармон билан тасдиқланган концепция доирасида қуйидаги асосий вазифалар белгиланган: 

•Маҳаллий Кенгашлар фаолиятининг мустақиллигини таъминлаш;

•Депутатларнинг халқ олдида ҳисобдорлиги ва таъсирчанлигини кучайтириш;

•Ҳар бир ҳудуд учун алоҳида ривожланиш дастурларини ишлаб чиқиш (“Янги туман - янги дастур” тамойили); 

•Электрон бошқарув, очиқ маълумотлар ва рақамли ҳисобдорлик тизимларини жорий этиш;   

•Конституциявий ислоҳотларга асосан маҳаллий ҳоким ва Кенгаш раиси лавозимларини ажратиш орқали назорат механизмларини мустаҳкамлаш.

Ушбу фармон асосида маҳаллий давлат бошқаруви соҳасида инсон манфаатларига хизмат қиладиган янги тизим барпо этилади. Шу билан бирга, фуқароларнинг ҳуқуқий онги ва фаоллиги ортиб, улар давлат бошқарувида тўғридан-тўғри иштирок этиш имкониятига эга бўлади. 

Концепция амалга оширилиши натижасида қуйидаги натижаларга эришиш кутилмоқда: 

•Маҳаллий муаммоларни ечишда жамоатчиликнинг иштироки ортиб боради;

•Ҳар бир қарор қабул қилиш жараёнида шаффофлик таъминланади;

•Давлат органларининг жавобгарлиги ва очиқлиги кучаяди;

•Маҳаллий ҳокимият фаолиятида рақобатбардош, адолатли ва барқарор механизмлар жорий этилади.

Қабул қилинган фармон маҳаллий давлат ҳокимиятини ривожлантиришга оид ислоҳотларнинг янги босқичини бошлаб берди. Бу ҳужжат фуқаролар ва жамоатчилик учун кенг имкониятлар эшигини очади, чунки қарор қабул қилиш жараёнида уларнинг фикри, ташаббуси ва иштирокини таъминлаш устувор вазифа сифатида белгиланган. 2030 йилгача бўлган истиқболда маҳаллий ҳокимият органлари халқ хизматига қаратилган, шаффоф, ҳисобдор ва самарали тузилмага айланиши кутилмоқда. Маҳаллий демократияни ривожлантириш ва фуқаролик жамиятини мустаҳкамлаш йўлидаги бу каби ислоҳотлар юртимизни янада фаровон келажак сари етаклайди.

Халқ депутатлари Учқудуқ туман

Кенгаши депутати Умар Худойқулов