Xalq deputatlari Xorazm viloyati Kengashi deputati Sadullayev Oybek Yusubbayevich Shovot tumanidagi Ogahiy mahallasida ko‘chama-ko‘cha yurib, aholi tomonidan ko‘tarilgan muammolarni joyida o‘rgandi.
Xalq deputatlari Xorazm viloyati Kengashining 2026-yil 31-martdagi VII-20-37-12-0-K/26-son qarori bilan tasdiqlangan manzilli dasturda belgilangan vazifalarning amaliy ijrosi yuzasidan hududlarda qurilish-ta’mirlash ishlari olib borilmoqda.
Jumladan, Ogahiy mahallasining “Ogahiy” va “Musavvir” ko‘chalaridagi zovurni yopiq drenaj tizimiga o‘tkazish ishlari amalga oshirilmoqda. Mazkur ishlarning belgilangan standart va talablarga muvofiq olib borilayotgani yuzasidan mahalla aholisi tomonidan murojaatlar bildirildi.
Deputat ushbu murojaatlarni joyida o‘rganish maqsadida ko‘chalarni aylanib, aholi bilan bevosita muloqot qildi hamda zovurni yopiq drenaj tizimiga o‘tkazish jarayonini ko‘zdan kechirdi.
O‘rganish davomida fuqarolarning fikr-mulohazalari tinglanib, qurilish ishlarining sifatli, belgilangan me’yor va standartlar asosida amalga oshirilishi yuzasidan mas’ullarga tegishli tavsiya va topshiriqlar berildi.
Bunday amaliy uchrashuvlar orqali aholi murojaatlarini joyida o‘rganish, mavjud muammolarga yechim topish va hududlarda amalga oshirilayotgan ishlar ustidan deputatlik nazoratini kuchaytirish ko‘zda tutilmoqda.