Har bir murojaat ortida insonning kundalik hayoti, oilasi va kelajagi bilan bog‘liq muhim masala turadi. Shu bois murojaatlarni shunchaki qabul qilish bilan cheklanib qolmasdan, ularning mazmunini atroflicha o‘rganish, qonuniy asosda tegishli choralar ko‘rilishini ta’minlash va ijrosini nazorat qilish muhim ahamiyat kasb etadi.

Shu maqsadda xalq deputatlari Termiz shahar Kengashi raisi, deputat D.Normuradova, kotibiyat mudiri, deputat A.Ashurov, Kengashning 14-“Bog‘zor” saylov okrugi deputati O.Sharofutdinova hamda kotibiyat bosh mutaxassisi R.Mamashukurovlar “Bog‘zor” mahallasida bo‘lib, hududdagi mavjud holat va aholini qiynayotgan masalalarni joyida o‘rgandilar.

Mazkur jarayon mahalliy Kengash deputatlari faoliyatining “24 ta muhim yo‘nalish” doirasida tashkil etilib, hududda amalga oshirilayotgan ishlarning samaradorligi, belgilangan vazifalar ijrosi hamda fuqarolar manfaatlarini ta’minlash borasidagi ishlar tahlil qilindi.

O‘rganish davomida mas’ullar mahalladagi Boborahim Mashrab ko‘chasida bo‘lib, ko‘chaning mavjud holati bilan yaqindan tanishdilar hamda shu hududda istiqomat qiluvchi fuqarolar bilan bevosita muloqot qildilar.
Suhbat davomida fuqarolar o‘zlarini qiynab kelayotgan masalalarni bayon qilib, hududda bolalar uchun bo‘sh vaqtini mazmunli o‘tkazish va sport bilan shug‘ullanish imkonini beradigan bolalar maydonchasi qurish zarurligini bildirdilar.
Shuningdek, ko‘chadagi mavjud elektr infratuzilmasi, xususan, elektr ustunlarining eskirganligi masalasi ham ko‘tarilib, ularni zamonaviy va xavfsiz ustunlarga almashtirish bo‘yicha amaliy yordam so‘raldi.
Muloqot jarayonida fuqarolarning fikr va takliflari tinglanib, ko‘tarilgan masalalarning dolzarbligi hamda ularni tegishli tashkilotlar bilan hamkorlikda hal etish imkoniyatlari muhokama qilindi.
Aniqlangan muammolar deputatlar tomonidan nazoratga olindi. Ularning qonuniy va amaliy yechimini ta’minlash maqsadida tegishli tashkilotlarga deputatlik so‘rovlari yuborilishi hamda murojaatlarning ijrosi belgilangan tartibda nazorat qilib borilishi belgilab olindi.
Bunday sayyor o‘rganishlar orqali deputatlar o‘z saylov okruglaridagi real holatni bevosita ko‘zdan kechirib, aholi bilan ochiq muloqot qilmoqda. Eng muhimi, fuqarolar tomonidan bildirilgan har bir taklif va murojaat e’tibordan chetda qoldirilmasdan, ularning yechimi bo‘yicha aniq choralar belgilanmoqda.