Өзбекстан бәрқулла көп миллетлилик ҳәм көп динлилик шараятында миллетлераралық ҳүрмет ҳәм татыўлық руўхы менен ажыралып келген. Ҳуқықый мәмлекет қурыўға қарай баратырған жәмиетимиздиң мәденияты ҳәм мәмлекетимиздиң демократиялық дәрежеси, миллий ҳәм етникалық топарларға жаратып берилген шараятлар ҳәм имканиятлар менен белгиленеди. Сол себепли олар мәдений өзине тәнликти қәлиплестирип, өзлериниң руўхый ҳәм ақылый потенциалын толық түрде жүзеге шығарып келмекте.  

Ҳүждан еркинлигин тәмийинлеў, миллетлер аралық ҳәм динлер аралық қатнасықларды үйлестириў тараўында өткерилип атырған ҳәр тәреплеме пуқта ойланған мәмлекетлик сиясат өз нәтийжесин берип атырғанлығы менен мақтаныў ушын барлық тийкарларымыз бар. 

Елимизде 16 түрли дин ҳәм коньфессияға тийисли 130 дан аслам миллет ҳәм халық ўәкиллери жасайды. Мәмлекетимизде алып барылып атырған ақылға уғрас миллий сиясат себепли елимизде жасап атырған түрли миллет ҳәм халықлар арасында өз-ара ҳүрмет, дослық,
аўызбиршиликке тийкарланған қатнасықлар қәлиплескен. Ең тийкарғысы, теңлик ҳуқықый жақтан кепилленген. Халкымыз арасында
миллетлераралық қатнасықлар, улыўма миллий татыўлық, кеңпейиллик, аўызбиршилик - әзелий улыўмаинсаныйлық принципи тикарында көп миллетли халқымыз аўызбиршиликли жасап, "бир жағадан бас шығарып" ел-журт раўажланыўы, ушын мийнет
етпекте.  

Ғәрезсиз раўажланыў жолын таңлаўда республиканың көп миллетлилигине үлкен әҳмиет бериледи, себеби гәп Өзбекстанда жасаўшы түрли миллетке тийисли жүз мыңлаған адамлардың тәғдири ҳаққында, олардың өз мәмлекетиниң раўажланыўы жолындағы
бирлесип дөретиўшилик иси ҳаққында барады. Республикада жасаўшы ҳәр қыйлы халықлардың көпшилиги ушын Өзбекстан қәдирдан ўатан болып қалған. 

Көп миллетли жәмийетте кеңпейиллик, өз ара исеним ҳәм ҳүрмет - миллетлер аралық татыўлықтың тийкары, мәмлекеттеги халықлар арасындағы өз ара қатнасықларды үйлестириўдиң ҳәрекетлендириўши күши болып есапланады. Миллетлер ҳәм елатлардың кеңпейиллиги,
өз-ара ҳүрмети - жәмиеттиң мәдениятлылық дәрежесиниң көрсеткиши, мәмлекеттеги миллетлераралық татыўлықтың тийкары ҳәм соның менен бирге келешектеги табыслы раўажланыўдың ең әҳмиетли шәрти болып табылады. 

Өзбекстан Республикасы Президентиниң социаллық ҳәм миллетлер аралық татыўлық ҳаққындағы, Өзбекстан - онда жасаўшы барлық халықлардың улыўма үйи ҳаққындағы баянаты, республикамыздың тийисли рәсмий ҳүжжетлери ҳәм ең дәслеп Өзбекстан Республикасы
Конституциясында өз көринисин тапқан. "Өзбекстан халқын, миллетине қарамастан Өзбекстан Республикасы пуқаралары қурайды," - деп атап өтиледи Конституцияда. 

 Бабамурат Қурбанов
Халық депутатлары Хожели районлық Кеңеси депутаты