Termiz shahrida fuqarolarning murojaatlariga tezkor va amaliy yechim topish, hududlarda sanitariya-tozalik va obodonlashtirish ishlarini tartibga solish borasidagi deputatlik nazorati izchil davom ettirilmoqda.

Xalq deputatlari Termiz shahar Kengashi kotibiyati mudiri, deputat A.Ashurov hamda Kengash kotibiyati bosh mutaxassisi R.Mamashukurovlar 20-“Eskishahar” saylov okrugi deputati Sh.Lolayevning saylov okrugiga qarashli “Eskishahar” mahallasida bo‘ldilar.

Mas’ullar mahalla faoli ishtirokida, to‘g‘ridan-to‘g‘ri aholidan kelib tushgan murojaatga asosan hududdagi La’l yo‘li ko‘chasidagi obodonlashtirish va sanitariya holatini bevosita joyiga chiqqan holda ko‘zdan kechirdilar.

Mazkur nazorat-tahlil jarayoni Oliy Majlis Senati tomonidan belgilangan “Mahalliy Kengash deputati faoliyatining eng muhim 24 ta yo‘nalishi” mezonlari doirasida tashkil etildi.

Ko‘chani ko‘zdan kechirish davomida aholining haqli e’tiroziga sabab bo‘layotgan holat — hududda maishiy chiqindilar to‘planib qolganligi, ularni o‘z vaqtida olib chiqib ketish xizmati qoniqarsiz tashkil etilganligi aniqlandi.

Aniqlangan kamchilikni zudlik bilan bartaraf etish, to‘planib qolgan chiqindilarni tozalash hamda ushbu ko‘chadan chiqindilarni olib chiqib ketish grafigini qat’iy tartibga solish maqsadida, muammo deputatning murojaat daftariga qayd etilib, mutasaddi tashkilotlarga deputatlik so‘rovi yuborilishi belgilab olindi.