“Yangi O‘zbekiston” massivida zamonaviy suv ta’minoti tizimi ishga tushirildi

Qo‘shko‘pir tumanining Yovg‘ir mahallasidagi “Yangi O‘zbekiston” massivida aholining turmush sharoitini yaxshilash, hudud infratuzilmasini rivojlantirish va fuqarolarni sifatli kommunal xizmatlar bilan ta’minlashga qaratilgan 68 milliard so‘mlik yirik infratuzilma loyihasi amalga oshirildi.

Loyiha doirasida 16,4 kilometr ichimlik va oqova suv tarmoqlari, 2 ming kub metr sig‘imli suv rezervuari, KOS va KNS hamda boshqa zarur infratuzilma obyektlari barpo etilib, zamonaviy suv tizimi foydalanishga topshirildi.
Mazkur muhim loyihaning ishga tushirilishi natijasida 13 ming 264 nafar aholi hamda 10 dan ortiq tashkilot markazlashgan ichimlik va oqova suv xizmatlaridan foydalanish imkoniyatiga ega bo‘ladi.
Tizimning ishga tushirilishiga bag‘ishlangan tadbirda Xalq deputatlari Qo‘shko‘pir tumani Kengashi deputatlari, tuman hokimi Shuxrat Axmedov, S. O‘razmetov, X. Ibragimov, shuningdek, nuroniylar va jamoatchilik faollari ishtirok etdi.
Ta’kidlash joizki, bunday yirik infratuzilma loyihalari “Inson qadri uchun” tamoyili asosida aholining munosib turmush sharoitini yaratish, hududlarni kompleks rivojlantirish va fuqarolarga qulayliklarni oshirishga qaratilgan davlat siyosatining amaliy ifodasidir.