Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq O‘zbekiston “Adolat” sotsial-demokratik partiyasidan saylangan deputat A.Mannobov tomonidan tumanning “Daxana” mahallasida qattiq maishiy chiqindilarni olib chiqib ketish xizmati sifati mahalla raisi ishtirokida o‘rganildi.

🟢O‘rganish davomida ayrim hududlarda chiqindilarni olib chiqib ketish belgilangan jadvaldan kechikib amalga oshirilayotgani aniqlandi. Natijada chiqindilar o‘z vaqtida olib chiqib ketilmagan holatlarda ularning to‘planib qolishi kuzatilmoqda. Xususan, yo‘l bo‘ylarida va aholi qatnovi yuqori bo‘lgan ayrim hududlarda chiqindilar to‘planib qolgani ko‘zdan kechirildi. Bu holat hududning sanitariya holatiga salbiy ta’sir ko‘rsatishi, atrof-muhitga noqulaylik keltirib chiqarishi va aholining e’tirozlariga sabab bo‘lishi mumkinligi qayd etildi.

🟢Deputat tomonidan chiqindi tashish xizmati faqat belgilangan grafik asosida transport vositasini yo‘naltirish bilan cheklanib qolmasdan, chiqindilarning to‘liq yig‘ilishi va hududning tozaligi ta’minlanishi bilan baholanishi lozimligi ta’kidlandi. Ko‘p qavatli uylarga yaqin hududlarda kichik chiqindilarni turlari bo‘yicha saralab yig‘ish uchun maxsus konteynerchalar o‘rnatish ishlari ko‘zdan kechirildi. Bunday konteynerlarni o‘rnatish orqali chiqindilarni alohida yig‘ish, hududda tozalikni saqlash va chiqindilarni qayta ishlashga yo‘naltirish imkoniyatlarini kengaytirish ko‘zda tutilgan.

🟢Deputat tomonidan mas’ullarga chiqindilarni olib chiqib ketish grafigiga qat’iy rioya qilish, kechikishlarning oldini olish, yo‘l bo‘ylarida to‘planib qolgan chiqindilarni zudlik bilan bartaraf etish hamda konteynerlar o‘rnatilgandan keyin ulardan samarali foydalanishni ta’minlash bo‘yicha tegishli tavsiyalar berildi.