Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq O‘zbekiston “Adolat” sotsial-demokratik partiyasidan saylangan deputat M.Ashurov va kotibiyat xodimi N.Kurganova tomonlaridan tumanda ko‘p qavatli uy-joylarga xizmat ko‘rsatuvchi “Titan Maxima” MChJ boshqaruv servis kompaniyasi faoliyati o‘rganildi.

🔺O‘rganish davomida kompaniya tomonidan ko‘p qavatli uylarda istiqomat qiluvchi fuqarolarga ko‘rsatilayotgan xizmatlar, uylarning umumiy foydalanishdagi qismlarini saqlash, hududni obodonlashtirish va sanitariya holatini ta’minlash bo‘yicha amalga oshirilayotgan ishlar bilan tanishildi. Shuningdek, aholi uchun yaratilgan sharoitlar, ko‘p qavatli uylarning atrofi va umumiy foydalanishdagi hududlarni saqlash holati ko‘zdan kechirildi. Kompaniya xodimlarining o‘z vazifalarini bajarishi, mavjud muammolarni aniqlash va ularni bartaraf etishga yondashuvi yuzasidan fikrlar o‘rganildi.

🔺O‘rganish jarayonida deputat tomonidan ko‘p qavatli uylarda istiqomat qiluvchi fuqarolar bilan bevosita muloqot qilinib, ularning boshqaruv servis kompaniyasi faoliyati va ko‘rsatilayotgan xizmatlar yuzasidan fikrlari tinglandi. Suhbatlar davomida aholi vakillari tomonidan kompaniya faoliyatiga ijobiy baho berildi. Fuqarolar ko‘rsatilayotgan xizmatlardan qoniqishini bildirib, mavjud masalalar bo‘yicha kompaniya xodimlari bilan hamkorlikda ish olib borilayotganini ta’kidladilar.

🔺Deputat tomonidan aholi bilan muloqotda bildirilgan fikr va takliflar kompaniya faoliyatini yanada takomillashtirishda muhim ahamiyatga ega ekani qayd etib, kompaniya mas’ullariga aholi bilan ochiq va doimiy muloqotni yo‘lga qo‘yish, fuqarolarning taklif va murojaatlarini inobatga olish, xizmat ko‘rsatish sifatini yanada oshirish hamda aholi roziligini ta’minlash bo‘yicha tegishli tavsiyalar berildi.