#deputat_nazorati
#24_muhim_masala

O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida Navbahor mahallasida tadbirkorlik va hunarmandlik faoliyati bilan shug‘ullanayotgan fuqarolarning mehnat faoliyati ham o‘rganildi.

Jumladan, tadbirkor Soipov Shukurillo Hunarmandlar uyushmasiga a’zo bo‘lgan holda kosibchilik faoliyati bilan shug‘ullanib kelmoqda. U o‘z kasbini rivojlantirish bilan bir qatorda, yoshlarni hunarga o‘rgatish va ularning bandligini ta’minlashga ham munosib hissa qo‘shmoqda.

Ayni paytda tadbirkorning 10 nafar shogirdi mavjud bo‘lib, ular kosibchilik sir-asrorlarini o‘rganish bilan birga, mehnat faoliyatiga jalb etilgan. Bu esa mahallada aholi, ayniqsa, yoshlar bandligini ta’minlash, ularni kasb-hunarga yo‘naltirish va daromad manbaiga ega bo‘lishlariga ko‘maklashish borasidagi amaliy natijalardan biridir.

O‘rganish davomida, shuningdek, hokim yordamchilari tomonidan amalga oshirilayotgan ishlar samaradorligi, xususan, aholini kambag‘allikdan chiqarish, ishsiz fuqarolarni kasb-hunar va tadbirkorlikka jalb etish, ularning daromad manbalarini kengaytirish bo‘yicha olib borilayotgan ishlarga ham e’tibor qaratildi.

Bunda mahallada mavjud imkoniyatlardan samarali foydalanish, hunarmandchilik va kichik tadbirkorlikni qo‘llab-quvvatlash orqali yangi ish o‘rinlari yaratish muhim omil sifatida namoyon bo‘lmoqda.

Soipov Shukurillo faoliyati misolida ko‘rish mumkinki, birgina hunarmandlik yo‘nalishini rivojlantirish orqali nafaqat oilaviy daromadni oshirish, balki boshqa fuqarolarni ham mehnatga jalb etish, ularga kasb o‘rgatish va mustaqil daromad manbaini shakllantirish imkoniyati yaratilmoqda.

Bunday tashabbuslarni qo‘llab-quvvatlash va ularning samaradorligini oshirish mahallada aholi farovonligini yuksaltirish, kambag‘allikni qisqartirish hamda fuqarolarning o‘z mehnati orqali munosib daromad topish imkoniyatlarini kengaytirishga xizmat qiladi.