Xalq deputatlari Angor tumani Kengashi 11-Navro‘z saylov okrugi deputati To‘rayev Norquvvot Tadjimurodovich tomonidan hududda aholi murojaatlari bilan ishlash, fuqarolar muammolarini joyiga chiqqan holda o‘rganish hamda ularning qonuniy manfaatlarini himoya qilishga qaratilgan navbatdagi nazorat tadbiri o‘tkazildi.

O‘rganish davomida fuqarolarning murojaatlari tinglanib, mavjud muammolarni joyida aniqlash va ularni tegishli tashkilotlar bilan hamkorlikda hal etish masalalariga alohida e’tibor qaratildi.
Shuningdek, mahalladagi xotin-qizlar faoli faoliyati ham o‘rganilib, ehtiyojmand va ijtimoiy ko‘makka muhtoj xotin-qizlarni qo‘llab-quvvatlash borasida amalga oshirilayotgan ishlar, jumladan, 2 nafar fuqaroga kredit ajratilgani haqida ma’lumotlar olindi.

Bundan tashqari, mahallaga biriktirilgan patronaj xodimlarining faoliyati ham deputatlik nazorati doirasida o‘rganildi. Patronaj xodimlari tomonidan nechta xonadonga tashrif buyurilgani, oilalarning ijtimoiy holati hamda tashriflar davomida aniqlangan muammolar yuzasidan ma’lumotlar tinglandi.

Deputat tomonidan aholi bilan bevosita muloqot qilish, muammolarni faqat qog‘ozdagi ma’lumotlar asosida emas, balki xonadonma-xonadon o‘rganish va amaliy yechim topish muhimligi ta’kidlandi.

Bunday nazorat tadbirlari hududdagi ijtimoiy masalalarni tizimli o‘rganish, aholining murojaatlariga o‘z vaqtida va manzilli yechim topish hamda deputatlik faoliyatining samaradorligini oshirishga xizmat qiladi.