Deputat tadbir davomida madaniy-ma’rifiy yo‘nalishdagi ishlarning ahamiyati, tarixiy merosimizni asrab-avaylash va uni keng targ‘ib qilish bugungi kunning dolzarb vazifalaridan biri ekanini alohida ta’kidladi. U o‘z nutqida Sohibqiron Amir Temurning boy merosi, uning davlat boshqaruvidagi tajribasi, adolat va qat’iyatga asoslangan siyosati bugungi jamiyat rivojida ham muhim o‘rin tutishini qayd etdi.

 Shuningdek, Mushurmonova Shodiya bunday tadbirlar orqali aholi, ayniqsa yosh avlod qalbida milliy g‘urur, tarixga hurmat va vatanparvarlik tuyg‘ularini mustahkamlash zarurligini bildirdi. Deputat tomonidan ushbu yo‘nalishda olib borilayotgan ishlarni yanada kuchaytirish, madaniy-ma’rifiy tadbirlarni tizimli tashkil etish yuzasidan takliflar ilgari surildi.

 Tadbir davomida Amir Temur hayoti va faoliyatiga oid ma’ruzalar, chiqishlar hamda badiiy namoyishlar tashkil etildi. Ishtirokchilar tomonidan Sohibqironning ibratli hayot yo‘li, tarixdagi o‘rni va bugungi avlod uchun ahamiyati keng yoritib berildi.

 Ta’kidlash joizki, deputatlar tomonidan bu kabi tadbirlarda faol ishtirok etish, aholi bilan muloqotni kuchaytirish, ma’naviy-ma’rifiy ishlarni qo‘llab-quvvatlash jamiyatda ijobiy muhitni shakllantirishga xizmat qilmoqda.

 Mazkur tadbir tarixiy merosimizni keng targ‘ib qilish, milliy qadriyatlarni mustahkamlash va kelajak avlodni har tomonlama barkamol etib tarbiyalash yo‘lida muhim qadamlardan biri bo‘ldi.