Xalq bilan muloqot hayotdagi muammolarni oydinlashtiradi. Shu bois, keyingi yillarda aholi orasiga chuqurroq kirib borish, xalq bilan yaqindan muloqot o‘rnatish, og‘irini yengil qilishga ko‘maklashish deputatlar faoliyatining asosiy mezoniga aylandi.

Xalq deputatlari viloyat Kengashi deputati G.Kravchenya va shahar Kengashi deputatlari G.Xudaykulova, A.Ashurovlar odamlarning dard-u tashvishlariga sherik bo‘lish, mavjud muammolarga yechim topish maqsadida "21-Jo‘yjangal" saylov okrugida saylovchilari bilan uchrashuv o‘tkazishdi.

Yuzma-yuz muloqot chog‘ida fuqarolarga keyingi yillarda mamlakatimizda barcha sohalarda amalga oshirilayotgan keng qamrovli islohotlar, qabul qilinayotgan yangi qonunlar, yangi tahrirdagi Konstitutsiyaning mazmun-mohiyati va ahamiyati haqida batafsil ma’lumotlar berildi.

Uchrashuv davomida saylovchilar tomonidan ularning qiynab kelayotgan muammo va takliflari tinglanib, tegishli tashkilotlarga deputatlik so'rovi bilan chiqish belgilandi.