Xalıq deputatları Bozataw rayonlıq Keńesi deputatı Q.Jamalov, Kók-suw máhálle baslıǵı hám jaslar jetekshisi menen birgelikte, deputat ózine biriktirilgen jaslar menen ushirasıwı bolıp ótti. 

Sońǵı jılları jaslarǵa qaratılıp atırǵan itibar mámleketlik siyasattıń baslı baǵdarlarınıń birine aylanıp, usı tiykarda olardıń óz qabiletin júzege shıǵarıwı, tereń bilim iyelewi hám ana Watanımızǵa sadıq xızmet etetuǵın pidayı insanlar bolıp kamalǵa keliwine barlıq imkaniyatlar jaratılmaqta. Bul baǵdarda orınlarda deputat hám jaslar ushırasıwları shólkemlestirilip, olardıń tilek-ótinishlerin tıńlaw jumısları sistemalı túrde jolǵa qoyılǵan. 

Ilaj dawamında turaqlı dáramat dáregine iye bolmaǵan jumıssız puqaralardı kásip-óner hám isbilermenlikke oqıtıw, máhállelerde isbilermenlikti rawajlandırıw, xalıqtıń isbilermenlik baslamaların qollap-quwatlaw maqsetinde kreditler ajıratılıwına kómeklesiw máselelerine ayrıqsha toqtap ótildi. 

Ashıq-aydın pikirlesiw usılında ótkerilgen ushırasıwda jaslar elimizdiń rawajlanıwı jolında xızmet etetuǵın bir qatar jańa ideyaları hám baslamaların bildirdi. Óz náwbetinde, barlıq pikirler esapqa alınıp, kóterilgen mashqalalarǵa ornında sheshimin tabıw ilajları kórildi hám jaslardıń barlıq baslamaları qollap-quwatlanatuǵınlıǵı ayrıqsha tilge alındı.