Ijro hokimiyati va mahalliy Kengash deputatlar o‘rtasida o‘zaro hamkorlik

Bugun, Sariosiyo tumani hokimligi katta majlislar zalida tuman hokimi O.Yaqubov va xalq deputatlari tuman Kengashi raisi M.Ashurov hamda deputatlari ishtirokida uchrashuv bo‘lib o‘tdi.

Unda, bugungi kunda tumanimizda olib borilayotgan keng ko‘lamli islohotlar har bir hudud, har bir mahalla hayotida o‘z ifodasini topayotganligi, shuningdek, tumanni ijtimoiy-iqtisodiy rivojlanish, infratuzilmani yaxshilash, aholi turmush darajasini oshirish yo‘lida salmoqli ishlar amalga oshirilayotganligi qayd etildi.

Xususan, 2025-yilda amalga oshirilgan ishlar hamda 2026-yilga hududlarni ijtimoiy-iqtisodiy rivojlantirishga mo‘ljallangan chora-tadbirlar ko‘rib chiqildi, jumladan, jamiyat va davlat hayotining muhim masalalarini hal etishda mahalliy davlat hokimiyati vakillik organlarining rolini oshirish borasida tumanda amalga oshirilishi lozim bo‘lgan ishlar, aholi muammolari va hudud manfaatlariga oid muhim va dolzarb masalalarni hal etishni ““mahalla yettiligi” - tuman Kengashi - viloyat Kengashi – Senat” tamoyili asosida kuchaytirish yo‘nalishida chora-tadbirlarni amalga oshirish hududni rivojlantirishning eng maqbul omillaridan biri ekanligini ta’kidladi.

Uchrashuvda, xalq deputatlari tuman Kengashi deputatlari va Kengash faoliyati samaradorligini oshirish hamda deputatlar tomonidan hudud manfaatlariga oid hamda aholi tomonidan ko‘tarilayotgan muhim va dolzarb masalalarni hal etish bo‘yicha imkoniyatlarni kengaytirishi xususida fikr almashildi.