Xalq deputatlari Uchko‘prik tumani Kengashiga “11-Qumariq” saylov okrugidan saylangan deputat Hasanboy Mamadaliyev
Qumariq qishloq ahli bilan kengroq davra oldi, mahalla vakillari bilan dolzarb masalalarda suhbatlashdi. Deputat mahalla muhiti barqarorligini saqlash, huquqbuzarliklarni barvaqt oldini olish, bu borada mahalla va yoshlar faollari “mahalla yettiligi” hamkorligida aholi muammolarini samarali hal etishda, ayniqsa, aksariyat masalalarni shu yerning o‘zida ijobiy yechim topishida muhim platforma bo‘lib xizmat qilayotganini ta’kidladi. 

“Yoshlarni vatanparvarlik ruhida tarbiyalash, yosh oilalar mustahkamligini ta’minlash, yoshlarning huquq va manfaatlarini himoya qilishga alohida e’tibor qaratishimiz zarur. Shuning bilan birga o‘smir-yoshlarni madaniyat, san’at va sportga muntazam jalb etish, ularda zamonaviy axborot texnologiyalaridan to‘g‘ri foydalanish ko‘nikmasini shakllantirish, kitobxonlik madaniyatini yuksaltirish bo‘yicha kechiktirib bo‘lmaydigan vazifalar diqqat-e’tiborimizdan chetda qolmasligi kerak”-dedi Hasanboy Mamadaliyev. 

Shuningdek mahalla vakillari bilan bo‘lgan uchrashuvda to‘y-marosimlar, hududdagi maktabda o‘quvchilar davomati masalasi, kuz-qish mavsumiga tayyorgarlik holati va yong‘in xavfsizligi xususida ham mushohadalar yuritildi. Uchrashuvda bildirilgan takliflar atroflicha ko‘rib chiqilib, umumlashtirildi. 

Xalq deputatlari Uchko‘prik tumani Kengashi kotibiyati