Xalq deputatlari Parkent tuman Kengashiga 21-Nevich saylov okrugidan saylangan deputat Yoqubova Xusnora Abduxamidovna tomonidan jamoatchilik nazoratini samarali tashkil etish maqsadida o‘zi saylangan hudud –“Qizilsoy” mahallasiga tashrif amalga oshirildi. Tashrif davomida mahallaga biriktirilgan hamshira N.Xaydarova tomonidan aholiga ko‘rsatilayotgan tibbiy xizmatlar holati batafsil o‘rganildi. Xususan, fuqarolarga birlamchi tibbiy yordam ko‘rsatish sifati, uyma-uy yurib patronaj xizmatini tashkil etish, surunkali kasalliklarga chalingan bemorlarni ro‘yxatga olish va ularni doimiy nazoratda ushlab borish ishlari ko‘zdan kechirildi. Bundan tashqari, aholining tibbiy ko‘riklardan o‘z vaqtida o‘tishi, profilaktik tadbirlarning samaradorligi, onalar va bolalar salomatligini muhofaza qilish, emlash jarayonlarining tashkil etilishi ham alohida e’tiborga olindi. Fuqarolarga tezkor va sifatli tibbiy xizmat ko‘rsatish, zarur dori-darmonlar bilan ta’minlanganlik darajasi ham o‘rganildi. O‘rganishlar davomida mavjud muammolar va kamchiliklar yuzasidan tegishli tavsiyalar berilib, tibbiy xizmat sifatini yanada oshirish, aholining salomatligini mustahkamlash hamda profilaktika ishlarini kuchaytirish bo‘yicha aniq vazifalar belgilab olindi. Mazkur tashrif mahalladagi mavjud muammolarni aniqlash, ularni bartaraf etish va aholi farovonligini oshirishga xizmat qilishi bilan ahamiyatlidir.