O‘zbekiston Respublikasi Oliy Majlisi Senati Kengashining 2024-yil 4-apreldagi “Mahallalardagi muammolarni hal etishda xalq deputatlari mahalliy Kengashlari deputatlari va senatorlarning “Mahalla yettiligi” bilan o‘zaro hamkorligini yo‘lga qo‘yish chora-tadbirlari to‘g‘risida”gi KQ-706-IV-sonli qarori ijrosini ta’minlash maqsadida joylarda tizimli ishlar olib borilmoqda. Xususan, Xalq deputatlari Parkent tuman Kengashiga 7-Xisorak saylov okrugidan saylangan deputat Salimboyev Xasan Dilmurodovich o‘zi saylangan hudud – “Quyosh” mahallasida bo‘lib, “Mahalla yettiligi” tomonidan amalga oshirilayotgan ishlar bilan yaqindan tanishdi. Tashrif davomida mahalladagi profilaktika inspektorining hududda jinoyatchilikka qarshi kurashish borasidagi faoliyati o‘rganildi. Ayniqsa, jinoyatchilik darajasi yuqori bo‘lgan “qizil” va “sariq” hududlarda huquqbuzarliklarning oldini olish yuzasidan amalga oshirilayotgan chora-tadbirlar atroflicha muhokama qilindi. Muloqot jarayonida profilaktika inspektorining amalga oshirgan ishlari yuzasidan hisobot tinglanib, uning xizmat faoliyati, mas’uliyat darajasi hamda alohida nazorat talab etuvchi fuqarolar bilan olib borilayotgan ishlar samaradorligi tahlil qilindi. Shuningdek, deputat tomonidan mahallada jinoyatchilikning oldini olish, “Xavfsiz mahalla” tizimini yanada samarali yo‘lga qo‘yish maqsadida ko‘chalarni videokuzatuv kameralari bilan jihozlash, aholi kam qatnovchi va hilvat hududlarga tungi yoritish chiroqlarini o‘rnatish bo‘yicha takliflar ilgari surildi. Tadbir yakunida “Mahalla yettiligi” a’zolari bilan birgalikda aholini qiynab kelayotgan dolzarb muammolar muhokama qilinib, ularni bartaraf etish yuzasidan kelgusidagi ustuvor vazifalar belgilab olindi.