Deputat hisoboti

Xalq deputatlari viloyat Kengashi deputati Akbarali Qayumov Samarqand shahridagi Nurli Kelajak mahallasida Shukrona, Madaniyat, Nurafshon, Chorbog‘ va Darg‘om mahallalari faollariga joriy yil davomida amalga oshirilgan ishlar yuzasidan hisobot berdi.

Qayd qilinishicha, 6-Mehrobod saylov okrugiga avval 25 ta mahalla qarashli bo‘lib, saylovchilar soni 30 010 nafarni tashkil etgan. Joriy yilda mahallalarning optimallashtirilishi natijasida hozirda okrugda 21 ta mahalla faoliyat olib bormoqda.

Okrugdagi saylovchilar uchun SMART CITY shaharchasida deputatlik qabulxonasi tashkil etilgan. Qabulxonada har bir mahalla uchun alohida ish papkalari shakllantirilib, mahalla pasportlari, fuqarolar murojaatlari va ularning ijrosi tizimli ravishda yuritilmoqda.

Yil davomida deputat tomonidan 7 marta sayyor qabul o‘tkazilib, Shukrona, Mehrobod, Said Rizo Alizoda, Ahillik mahallalarida, shuningdek Samarqand shahar monomarkazi hamda Musiqa va san’at maktabi majlislar zalida uchrashuvlar tashkil etilgan.

Muloqotlarda 190 dan ortiq murojaatlar qabul qilingan.

Tahlillarga ko‘ra, elektr ta’minoti va ko‘cha yoritish masalalari bo‘yicha 25 ta, tabiiy gaz ta’minoti bo‘yicha 18 ta, ichimlik va oqova suv ta’minoti bo‘yicha 17 ta, yo‘l harakati xavfsizligi va transport masalalari bo‘yicha 10 ta, obodonlashtirish va asfaltlash bo‘yicha 24 ta, chiqindilarni olib ketish bo‘yicha 25 ta, sog‘liqni saqlash tizimi bo‘yicha 10 ta hamda boshqa masalalar yuzasidan 61 ta murojaat kelib tushgan.

Mazkur murojaatlarni hal etish maqsadida 36 ta deputatlik so‘rovi chiqarilgan. Natijada qator ijtimoiy ahamiyatga ega masalalar ijobiy hal etilgan. Xususan, Mehrobod mahallasidan Xolmamedov Sobirali Nosiralivichga yurak operatsiyasi uchun elektron order olib berilib, 60 million so‘m mablag‘ ajratilgan. Shuningdek, uning turmush o‘rtog‘i ham imtiyozli davolanish uchun order bilan ta’minlangan.

Bundan tashqari, Shukrona va Mirzo Bedil mahallalarida chiqindilar uchun konteyner maydonchalari o‘rnatilib, gaz bosimini oshirish masalasi hal etilgan. Qator mahallalarda ichki ko‘chalar ta’mirlanib, asfalt qoplamalari yangilandi. Farog‘at mahallasida ichimlik suv quvurlaridagi muammolar bartaraf etilib, 250 metr quvur to‘liq almashtirildi.

“Yashil makon” umummilliy loyihasi doirasida 6-Mehrobod saylov okrugidagi mahallalar markazlari va xonadonlar oldiga 1200 tup archa va manzarali daraxt ko‘chatlari ekilib, atrof-muhitni obodonlashtirish ishlari amalga oshirildi.

Shuningdek, deputat joriy yil davomida O‘zLiDeP deputatlik guruhi yig‘ilishlarida 8 marta, doimiy komissiya yig‘ilishlarida 7 marta hamda viloyat Kengashi sessiyalarida 18 marta ishtirok etgan. Ommaviy axborot vositalarida faol ishtirok etib, markaziy televideniyeda 2, mahalliy televideniyeda 7 marta, gazeta va ijtimoiy tarmoqlarda ko‘plab chiqishlar qilgan.

Ushbu amalga oshirilgan ishlar 6-Mehrobod saylov okrugida aholi turmush darajasini yaxshilash, ijtimoiy muammolarni hal etish hamda mahallalar infratuzilmasini rivojlantirishga xizmat qilmoqda.