Yig‘ilishda viloyat prokurori B.Babadjanov tomonidan viloyatda korrupsiyaga qarshi kurashish borasida amalga oshirilayotgan ishlar, erishilgan natijalar va mavjud muammolar haqida ma’lumot berildi.
Ta’kidlanganidek, viloyatda 26 ta bozor va savdo kompleksi raqamlashtirilib, qo‘shimcha 3 760 ta savdo rastasi tashkil etilishi natijasida bozorlar tushumi 5,2 mlrd so‘mga oshgan. Tibbiyot tizimida ham raqamlashtirish orqali qo‘shimcha mablag‘lar shakllantirilgan.
Shu bilan birga, ayrim hududlarda raqamlashtirish ishlari hali to‘liq samaradorlik bermayotgani, xususan, bozorlar va avtoturargohlarda tushumlarni to‘liq va shaffof hisobga olish, yagona elektron tizimda nazorat qilish borasida kamchiliklar mavjudligi tanqidiy qayd etildi.
Asosiy talab — raqamlashtirishni qog‘ozdagi hisobot uchun emas, balki korrupsiyaviy omillarni amalda bartaraf etish, inson omilini kamaytirish va tushumlarning shaffofligini ta’minlashga yo‘naltirish.
Yig‘ilish davomida mas’ul rahbarlarga aniqlangan kamchiliklarni bartaraf etish va korrupsiyaga qarshi kurashish bo‘yicha amaliy choralarni kuchaytirish yuzasidan tegishli vazifalar belgilanmoqda.