Imkoniyati cheklangan fuqaroning ijtimoiy holati o‘rganildi

Xalq deputatlari Namangan shahar Kengashi deputati, Namangan shahar hokimi Ayubxon Kamolov tomonidan Sanoat mahallasida istiqomat qiluvchi imkoniyati cheklangan fuqaro Tohirjon Axmedov xonadoniga tashrif buyurilib, uning yashash sharoiti, ijtimoiy holati hamda davlat tomonidan yaratilgan ijtimoiy himoya mexanizmlaridan foydalanish darajasi joyiga chiqqan holda o‘rganildi.

Tashrif davomida fuqaroning kundalik turmush tarzi, sog‘lig‘i bilan bog‘liq holati, mavjud ehtiyojlari hamda murojaatlari atroflicha tinglandi. Ochiq muloqot jarayonida bildirilgan taklif va masalalarni qonunchilik talablari asosida hal etish, zarur tibbiy, ijtimoiy va maishiy ko‘makni tashkil etish yuzasidan mas'ul tashkilotlar rahbarlariga tegishli topshiriqlar berildi.

Shuningdek, fuqaroning davlat tomonidan belgilangan imtiyoz va ijtimoiy xizmatlardan to‘liq foydalanishini ta'minlash, aniqlangan muammo va kamchiliklarni qisqa muddatlarda bartaraf etish hamda belgilangan vazifalar ijrosini qat'iy nazoratga olish bo‘yicha aniq chora-tadbirlar belgilandi.

Mazkur tashrif ijtimoiy himoyaga muhtoj fuqarolarning muammolarini joyida o‘rganish, ularning qonuniy manfaatlarini ta'minlash, davlat tomonidan yaratilgan imkoniyat va imtiyozlarning amaliy ijrosini kuchaytirish hamda "Inson qadri uchun" tamoyilini hayotga izchil tatbiq etish yo‘lidagi tizimli ishlarning uzviy davomi hisoblanadi.

📖 Huquqiy asos:

Mazkur tashrif O‘zbekiston Respublikasining "Nogironligi bo‘lgan shaxslarning huquqlari to‘g‘risida"gi Qonuni (O‘RQ–641, 2020-yil 15-oktabr) hamda "Keksalar, nogironligi bo‘lgan shaxslar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida"gi Qonuni (O‘RQ–415, 2016-yil 26-dekabr) talablari ijrosini ta'minlash doirasida amalga oshirildi.