Ta’lim sifati va yosh avlod tarbiyasi bevosita ustoz va murabbiylarning fidokorona mehnati bilan chambarchas bog‘liq. Shu bois pedagoglar bilan ochiq muloqot qilish, ularning fikr va takliflarini tinglash hamda mehnatini munosib e’tirof etish muhim ahamiyat kasb etadi.

Fuqarolar bilan ochiq muloqotdan so‘ng, Oliy Majlis Qonunchilik palatasi deputati R. Astanaqulova, xalq deputatlari Termiz shahar Kengashi raisi, deputat D. Normuradova hamda Kengashning 12-“Saxovat” saylov okrugi deputati X. Jurayevlar “Tinchlik” mahallasidagi 22-sonli umumta’lim maktabiga tashrif buyurdilar.

Tashrif davomida maktab pedagoglari bilan samimiy suhbat o‘tkazilib, 1-oktabr — O‘qituvchi va murabbiylar kuni munosabati bilan ustozlarning sharafli va mas’uliyatli mehnati alohida e’tirof etildi.

Suhbat davomida mamlakatimizda ta’lim tizimini rivojlantirish, o‘qituvchi va pedagoglarning jamiyatdagi nufuzi hamda mavqeyini yuksaltirish, ular uchun munosib mehnat sharoitlarini yaratish borasida amalga oshirilayotgan islohotlar yuzasidan fikr almashildi.

Shuningdek, pedagoglarga yaratilayotgan imkoniyat va berilayotgan imtiyozlar, ta’lim sifatini oshirish, yosh avlodga zamonaviy bilim va puxta tarbiya berishda ustozlarning muhim o‘rni haqida so‘z yuritildi.

Deputatlar maktab jamoasini kasb bayrami bilan samimiy muborakbod etib, ularning fidokorona mehnati uchun minnatdorlik bildirdilar.

Zero, bugungi ustoz mehnati — ertangi avlod kamolotining mustahkam poydevoridir!