Termiz shahrida yo‘llarning holatini yaxshilash, transport vositalari harakati uchun qulay va xavfsiz sharoit yaratish hamda aholi murojaatlarida ko‘tarilayotgan yo‘l infratuzilmasiga oid muammolarni amaliy hal etish borasida deputatlik nazorati tadbirlari izchil davom ettirilmoqda.

Shu doirada Xalq deputatlari Termiz shahar Kengashi kotibiyati mudiri, deputat A.Ashurov, Kengash kotibiyati bosh mutaxassisi A.Temirov tomonidan Kengashning 20-“Eskishahar” saylov okrugi deputati Sh.Lolayev okrugiga qarashli “Eskishahar” mahallasidagi yo‘llarning holati o‘rganildi.

So‘fi Olloyor ko‘chasida o‘tkazilgan o‘rganish davomida yo‘l qoplamasida yuzaga kelgan cho‘kish va o‘pirilish holati joyiga chiqqan holda ko‘zdan kechirildi. Mazkur holat transport vositalari harakatiga noqulaylik tug‘dirayotgani hamda yo‘l harakati xavfsizligiga salbiy ta’sir ko‘rsatishi mumkinligi qayd etildi.

Nazorat-tahlil jarayoni Oliy Majlis Senati tomonidan belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida olib borilib, xususan, 8-band — “Mahalla ichki ko‘cha yo‘llari holati” ijrosiga alohida e’tibor qaratildi.

O‘rganish yakunlari bo‘yicha:

▪️ aniqlangan yo‘l cho‘kishi holati deputatning murojaat daftariga qayd etilib, nazoratga olindi;

▪️ yo‘lning cho‘kishiga sabab bo‘layotgan omillarni aniqlash, jumladan, grunt holati hamda suv va oqova quvurlarining texnik holatini o‘rganish;

▪️ aniqlangan nosozliklarni bartaraf etish, yo‘l qoplamasini qayta tiklash va ta’mirlash yuzasidan tegishli tashkilotlarga deputatlik so‘rovi yuborish belgilandi.

Deputatlik nazoratining asosiy maqsadi — muammoni aniqlash bilan cheklanib qolmasdan, uni mas’ul tashkilotlar bilan hamkorlikda amaliy yechimga yo‘naltirishdir.

Xalq deputatlari Termiz shahar Kengashi tomonidan hududlardagi mavjud muammolarni manzilli o‘rganish va ularning yechimini nazoratga olish ishlari davom ettiriladi.