Xalq deputatlari Qo‘qon shahar Kengashining “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi a’zolari tomonidan shahardagi 6-son Bolalar musiqa va san’at maktabida dizayn va moda yo‘nalishi hamda zargarlik ishi bo‘yicha tahsil olayotgan o‘quvchilar uchun yaratilgan shart-sharoitlar yuzasidan o‘rganish ishlari olib borildi.

O‘rganish davomida mazkur yo‘nalishlarda mashg‘ulotlar olib boriladigan o‘quv xonalari, mavjud jihozlar va amaliy mashg‘ulotlarni tashkil etish imkoniyatlari ko‘zdan kechirildi.

Dizayn va moda yo‘nalishida o‘quvchilarning ijodiy qobiliyatlarini rivojlantirish, amaliy ko‘nikmalarini shakllantirish hamda zamonaviy dizayn yo‘nalishlarini o‘rganish uchun yaratilgan imkoniyatlarga e’tibor qaratildi.

Zargarlik ishi yo‘nalishida esa o‘quvchilarning amaliy mashg‘ulotlari, zarur asbob-uskunalar bilan ta’minlanganligi, xavfsizlik talablariga rioya qilinishi hamda kasbiy ko‘nikmalarni egallash uchun yaratilgan sharoitlar o‘rganildi.

Shuningdek, yoshlarning ijodiy va amaliy salohiyatini yanada rivojlantirish, ularni zamonaviy kasblarga yo‘naltirish hamda iqtidorli o‘quvchilarni qo‘llab-quvvatlash masalalari yuzasidan fikr almashildi.

O‘rganish yakunida mavjud sharoitlarni yanada takomillashtirish va o‘quvchilarning ijodiy imkoniyatlarini kengaytirish bo‘yicha tegishli taklif va tavsiyalar bildirildi.

Xalq deputatlari Qo‘qon shahar Kengashi