Халқ депутатлари Янгиқўрғон туман Кенгаши депутати

Боймирзаев Улуғбек Муҳаммаджонович томонидан ўз сайлов округи ҳудудида оилалар мустаҳкамлигини таъминлаш, ижтимоий муҳит барқарорлигини сақлаш ҳамда низоли ҳолатларни бартараф этишга қаратилган тизимли ишлар амалга оширилмоқда.

Жумладан, туман яраштириш комиссияси аъзолари, маҳалла фуқаролар йиғини фаоллари, нуронийлар ва мутасадди ташкилотлар вакиллари иштирокида ҳудуддаги низоли оилалар билан учрашувлар ташкил этилди. Ушбу учрашувлар давомида ҳар бир оиланинг муаммоси индивидуал тарзда ўрганилиб, келиб чиққан келишмовчилик сабаблари атрофлича таҳлил қилинди.

Суҳбатлар жараёнида оилаларга ҳуқуқий ва маънавий тушунтиришлар берилди, сабр-тоқат, ўзаро ҳурмат ва келишув асосида масалаларни ҳал этиш бўйича амалий тавсиялар тақдим этилди. Шунингдек, оилавий қадриятларни мустаҳкамлаш, фарзандлар тарбиясидаги масъулиятни ошириш ва жамиятда соғлом маънавий муҳитни шакллантириш борасида ҳам кенг қамровли тушунтириш ишлари олиб борилди.

Олиб борилган самарали ишлар натижасида бир қатор оилалар ўртасидаги низолар бартараф этилди, айрим ажралиш ёқасига келиб қолган оилалар яраштирилиб, уларни қайта тиклашга эришилди. Бу эса нафақат ушбу оилалар, балки бутун маҳалла ижтимоий муҳитига ижобий таъсир кўрсатмоқда.

Шуни алоҳида таъкидлаш жоизки, бундай эзгу ташаббуслар оила муқаддаслигини асраш, жамиятда меҳр-оқибат ва ҳамжиҳатликни мустаҳкамлаш, ёш авлодни соғлом муҳитда тарбиялашда муҳим аҳамият касб этади.