MÁHÁLLENIŃ RAWAJLANÍWÍ - XALÍQ PÁRAWANLÍǴÍ.

Ózbekstan Respublikası Prezidentiniń Oliy Majliske hám pútkil xalqımızǵa jollagan Múrájatı elimiz tariyxında úlken siyasıy-huqıqıy hám tariyxıy hújjet esaplanadı.

Múrájatta mámleketimizdiń rawajlanıwında strategiyalıq baǵdarlar, sociallıq ekonomikalıq rawajlanıwlar haqqındaǵı usınıslar, hákimiyat wákillikleriniń bóliniwi principlerin támiyinlew, sonday-aq, mámleketimizde ótken jıl dawamında ámelge asırılǵan jumıslar hám kelesi jılda isleniwi tiyis wazıypalarǵa toqtap ótildi.

       1991-jildan baslap hár jılı kelesi jılǵa atama beriw dástúrge aylanǵan. Mine, usı tárizde Prezidentimiz kirip kiyatırǵan 2026-jıldı - Máhálleni rawajlandırıw hám jámietti jetilistiriw jılı dep járiyaladı.

Tariyx dawamında qanshelli awır sınaqlarǵa dus kelsek te, biz eń dáslep awızbirshilikten kúsh aldıq. Mashaqatlı kúnlerde adamlarımız, máhálle xalqı iyinles bolıp talay qıyınshılıqlardı jeńgen. Shańaraq-shańaraqqa, qonsı-qonsıǵa járdem berip jasaǵan. Biz mine usınday oǵada biybaha qádiriyatımızǵa bárqulla sadıq qalamız, jaslarımızdı da mine usınday tárbiyalawımız kerek.

Biraq, milleti, tili hám dinine qaramastan 38 millionlıq el-jurtımızdı birlestiretuǵın ullı bir ideya bar, ol da bolsa Watan mápi, xalqımızdıń mápi.

Mine, usınday ullı maqsetke erisiwde máhálle sistemasınıń ornı, tásiri sheksiz. Sebebi, máhálle tınıshlıq hám tatıw bolsa, jámiyetimiz tınısh hám awızbirshilikli boladı. Máhálle rawajlansa, pútkil mámleketimiz rawajlanadı, - dedi Prezidentimiz.

Ullı keleshekke názer taslap, xalqımız ushın, sonıń ishinde, xalıqtıń tınıshlıǵı, olardıń huqıq hám máplerin qorǵawday ullı jumıslardı alıp barıwımız kerek ekenligin xalıqqa jáne bir márte túsindirdi hám bul iste máhálledegidey ullı kúsh bar ekenligine isendirdi. Álbette, máhálle tınısh, el tınısh, máhálle rawajlansa, xalıqtıń párawanlıǵı artadı. Bul iste bolsa, máhálle degenimiz bul xalıq eken, demek usı tınıshlıqtı, usı abadanlıqtı, tatıwlıqtı turaqlı túrde saqlap qalıw bárshemizdiń wazıypamızǵa aylanadı.

  R.QARMISOVA,

Xalıq deputatları Qaraózek rayonlıq Keńesi deputatı, ÓzXDP rayonlıq Keńesi baslıǵı