Yurtimizda haftaning har payshanba kuni “Yoshlar kuni” sifatida belgilangan bo‘lib, ushbu tashabbus hurmatli Prezidentimiz tomonidan ilgari surilgan va yoshlar bilan ochiq muloqotni kuchaytirishga qaratilgan. Shu kun doirasida joylarda yoshlar bilan muloqot tadbirlari tashkil etilmoqda. Shu munosabat bilan xalq deputatlari Zarbdor tuman Kengashi deputati, Yangikent mahalla fuqarolar yig‘ini raisi F. Sarimsakov 18-sonli umumiy o‘rta ta’lim maktabining o‘quvchilari hamda mahalla yoshlari bilan uchrashuv o‘tkazdi. Uchrashuv davomida yoshlarning ta’lim jarayoni, kasb tanlash istiqbollari, bo‘sh vaqtini mazmunli o‘tkazish va ijtimoiy faollik masalalari muhokama qilindi. Shuningdek, o‘quvchilarning kelajakdagi rejalari tinglanib, ularga amaliy tavsiyalar berildi. Muloqot jarayonida yoshlarni vatanparvarlik ruhida tarbiyalash, huquqiy savodxonlikni oshirish va sog‘lom turmush tarzini targ‘ib qilishga alohida e’tibor qaratildi.
Mazkur uchrashuv Prezident tomonidan ilgari surilgan tashabbusga muvofiq yoshlar bilan samarali muloqotni rivojlantirish va ularning kelajakka bo‘lgan ishonchini mustahkamlashga xizmat qildi.